Reitór UNTL, João Soares Martins. Imajen TATOLI/Francisco Sony

DILI, 03 fevereiru 2022 (TATOLI)—Universidade Nasionál Timor-Lorosa’e (UNTL), tinan ne’e sei loke vaga ba kandidatu estudante foun rejime jerál hamutuk 4.100, bazeia ba rekomendasaun hosi Ministériu Ensinu Superiór Siénsia no Kultura (MESSK), nune’e parte universidade garante fasilidade sufisiente.

Tuir Reitór UNTL, João Soares Martins, proposta universidade ba tinan ne’e hakarak simu estudante foun hamutuk 3.335, maibé hafoin relata ba MESSK iha mudansa kuantidade.

“Ami-nia proposta hakarak simu estudante rejime jerál ba tinan ida-ne’e 3.335, maibé hafoin ami submete proposta ba ministériu, mosu desizaun foun atu husu aumenta númeru estudante sa’e ba 4.100,” Reitór UNTL hateten ba Agência TATOLI, kinta ne’e.

Notísia relevante: KAEES halo korresaun pontu ezame hosi aplikante 5.422 asesu UNTL-IPB

Desizaun ne’e ministériu foti bazeia ba situasaun COVID-19, ne’ebé akontese iha mundu inklui iha Timor-Leste, tanba ne’e desizaun ne’ebé iha UNTL kumpre no tinan ida-ne’e tenke ezekuta tuir númeru ne’ebé MESSK rekomenda.

UNTL molok atu simu rekomendasaun ministériu, garante ona katak fasilidade ne’ebé UNTL iha sufisiente atu akomoda estudante submetidu.

Enkuantu, rejime espesiál ba estudante sira atu asesu UNTL no Institutu Politékniku Betano (IPB), daudaun ne’e iha hela prosesu korresaun ezame tanba sei iha hela andamentu no seidauk iha rezultadu finál.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

1 KOMENTÁRIU

HAKEREK NO HATÁN

Please enter your comment!
Please enter your name here