Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Imajen TATOLI/António Gonçalves.

DILI, 03 fevereiru 2022 (TATOLI)—Ministru Asuntu Parlamentár no Komunikasaun Sosial (MAPKOMS), Francisco Martins da Costa Pereira Jerónimo, informa subsídiu ba jornalista liña frente submete ona ba finansa MAPKOMS hodi halo verifikasaun no ninia prosesu ne’e la’o hela.

Notísia Relevante: Ministru Francisco: “Jornalista iha Direitu Hetan Subsídiu Liña Frente ho Baze Dekretu-Lei”

“Iha ne’e, despaixu ha’u halo tiha hotu ona no prosesu iha hotu ona Finansa, tanba ita-boot sira hatene mezmu ba tiha finansa, maibé tenke liu tan fali hosi Sekretáriadu Fundu COVID-19 nian atu bele halo verifikasaun ikus hafoin halo pagamentu, ne’ebé prosesu la’o hela,” Francisco Martins da Costa Pereira Jerónimo, hateten ba jornalista sira iha Palásiu Governu, Díli, ohin.

Prosesu pagamentu la’o kleur tanba prepara lei la’ós fasil no lais hodi hetan aprovasaun, tanba lei ne’e ba Prezidente Repúblika mós presiza fulan ida, nune’e bainhira to’o mai mak halo prosesu tuir regra normá maibé agora tama ona iha finansa hodi hein ninia rezultadu ikus.

Prosesu pagamentu depende ba finansa tanba MAPKOMS nia prosesu halo identifikasaun, verifikasaun no aprovasaun lista haruka ba Finansa atu prosesa ikus kona-ba pagamentu ni’an.

Diretór Finansa Ministériu Asuntu Parlamentar no Komunikasaun Sosial (MAPKOMS), Adriano Monteiro, hateten lista ba jornalista liña frente daudaun ne’e sei iha finansa MAPKOMS tanba sei halo verifikasaun ba dadus.

“Lista ba jornalista liña frente daudaun sei iha finansa MAPKOMS, tanba iha janeiru 2022 ne’e RTTL nian haruka hadi’a fila-fali, entaun ami hadi’a fali. Nune’e, mós ba TATOLI, tanba iha dezembru tinan kotuk sira mós haruka ami hadi’a fali, entaun ami hadi’a fila-fali tanba aumenta tan dadus no agora ami ajusta hotu hela,” nia informa.

Aleinde ne’e, iha tempu badak sei bolu fali Tatoli atu hatama Konta Bankaria, tanba lista haruka mai MAPKOMS ne’e naran de’it.

“Maibé, ami konsege hatama tuir formatu ne’ebé iha sistema, depois Tatoli sira tenke hatama fali konta bankaria hanesan transferénsia uluk nian, tanba maioria lista mai ne’e naran de’it, ita atu halo pagamentu ne’e susar. Ne’ebé iha semana ida ka rua, ami iha dadus hotu, ami sei kontaktu direta ho ita-boot (Tatoli) sira atu mai finaliza dokumentu, nune’e ami verifika hotu dadus, ami manda ona ba Ministériu Finansa hodi bele halo ona pagamentu,” nia informa.

Entretantu, jornalista liña frente ne’ebé sai nu’udar benefisiáriu hamutuk 420, kompostu hosi mídia privadu no no mídia Estatál.

Notísia Relevante: PN husu MAPKOMS aselera subsídiu ba jornalista liña frente

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

1 KOMENTÁRIU

  1. haluhan tiha Tribunal, la hatene katak durante ne’e, Tribunal mos hal’ao hela sira nia knar hanesan bai-bain, maske iha situasaun pandemia nia laran.

HAKEREK NO HATÁN

Please enter your comment!
Please enter your name here