Primeiru-Ministru, Taur Matan Ruak, hato’o felisitasaun ba jornalista timor-oan no mós jornalista hotu iha mundu tomak ba loron mundiál liberdade imprensa ne'ebé selebra iha loron 03 maiu, kada tinan. Imajen/GPM

DILI, 19 janeiru 2022 (TATOLI)—Reprezentante povu iha uma fukun Parlamentu Nasionál (PN), kontinua husu ba Ministéiru Asuntu Parlamentár no Komunikasaun Sosiál (MAPKOMS), atu aselera pagamentu ba jornalista liña frente ne’ebé presta ona servisu esensiál iha ambitu luta konta COVID-19 durante ne’e.

Notísia Relevante: PR promulga dekretu-lei subsídiu ba profisionál komunikasaun sosiál

Deputadu CNRT, Patrocinio Fernandes, hateten dekretu Governu ba atribuisaun subsídiu ba jornalista liña frente promulga hosi Prezidente Repúblika no públika ona iha jornál repúblika maibé prosesu pagamentu seidauk realiza.

“Jornalista tau-nia vida iha risku boot, ne’e duni iha direitu absolutamente atu bele sai hanesan benefisiáriu ba subsídiu liña frente ninian,” Deputadu Patrocínio Fernandes hateten ba jornalista sira iha Parlamentu Nasionál, kuarta ne’e.

Tanba, nia dehan, papél jornalista sira-nian importante tebes iha divulgasaun informasaun ne’ebé informativu ba regra prevensaun, hodi fó sai númeru kazu no vasinasaun ne’ebé kontribui tebes iha ambitu luta kontra COVID-19.

Atu define pesoál sira-ne’ebé presta ona servisu esensiál ne’e ministéiru tutela mak iha kompeténsia hodi halo verifikasaun lista ne’ebé iha dekretu lei define ona.

Deputadu Partidu Libertasaun Populár, Francisco de Vasconselo, hateten mekanizmu pagamentu iha tinan anteriór to’o 31 dezembru ramata ona, klaru agora pagamentu sira-ne’ebé pendente tama iha Orsamentu Jerál Estadu (OJE) 2022.

“Ita hatene orsamentu foin mak Prezidente Repúblika promulga iha janeiru nia laran, entaun hanesan uluk ne’e sistema free balance loké iha fevereiru ka marsu nia laran, tanba ne’e la kleur Governu selu ona tanba orsamentu aprova ona,” nia hateten.

Nune’e, nia husu ba parte relevante agora haree prosesu andamentu prenxe ona kriteiru sira sei hetan pagamentu.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

1 KOMENTÁRIU

  1. Governo Haluhan tiha Tribunal, ne’ebe mak durante ne’e halo mos servisu iha Lina Frente, tanba iha dekreto lei husi governo iha SS, KO ne’ebe hahu kedas iha tinan 2020 no 2021 nian, katak Tribunais, Banku no seluk tan funsiona ho normal.
    Ex, mak iha situasaun sira hanesan SS, KO, kuandu mosu problema ruma, mak policia detein 72 horas Tribunal tenke atende ho lalais, no durante SS no KO, Tribunal mos hala’o nia funsaun ho normal, depois Oficial balu no Juiz balu tenke simu konsekuensia iha altura ne’eba, tanba kona Covid, ikus mai sira tenke husik hela sira nia familia hodi ba baixa ka toba iha Sala Izolamento ne’eba, tanba kumpri regras ne’ebe mak governo dekreta, hodi hala’o sira nia funsaun hanesan bai-bain. Maibe ikus mai Governo no Presidente da Republika haluhan tiha autor Judicial sira hanesan, Juiz no Oficial no la konsideira hanesan mos lina frente, iha situasaun defisil sira hanesan Serka Sanitaria no Kompionamento Obrigatorio.

HAKEREK NO HATÁN

Please enter your comment!
Please enter your name here