Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu. Kuarta (19/02/2020). Imajen/TATOLI Egas Cristovao.

DILI, 19 fevereiru 2020 (TATOLI) – Governu liuhosi reuniaun Konsellu Ministru (KM) iha kuarta ne’e, aprova Proposta Rezolusaun Governu ne’ebé aprezenta hosi Primeiru-Ministru (PM), Taur Matan Ruak, ba revogasaun Rezolusaun Governu númeru 16/2013 10 jullu, ne’ebé bandu Grupu Arte-Marsiál (GAM) hala’o atividade.

Ministru Reforma Lejizlativa no Asuntu Parlamentár, Fidelis Manuel Leite Magalhães, informa diploma legál ne’e, instroi Polísia Nasionál Timor-Leste (PNTL) atu intensifika asaun kombate krime sira kona-ba prátika ilísitu husi Arte-Marsiál no Rituál sira.

“Governu husu ba PNTL atu intensifika nia asaun sira, atu kombate krime ne’ebé relasiona ho prátika ilísitu sira husi Grupu Arte-Marsiál no Arte-Rituál. Entaun, saida mak rezolusaun ne’e hatuur, rezolusaun ne’e dehan Arte-Marsiál bele prátika maibé tenke ho lei númeru 5 kona-ba Arma Branka no Arte-Marsiál”, informa Ministru Fidelis hafoin reuniaun ezekutivu iha Palásiu Governu.

Governante ne’e esplika, aprovasaun Rezolusaun Governu ne’e signifika katak GAM bele prátika maibé tenke tuir lei tanba iha rezolusaun antes ne’e bandu labele prátika, maibé hafoin revoga rezolusaun anteriór, agora bele prátika maibé tuir lei.

Rezolusaun Governu Taka GAM

Iha loron 2 jullu 2013, Governu liuhosi desizaun KM estraordinária, hasai Rezolusaun Governu númeru 16/2013 kona-ba estinsaun GAM no determina estinsaun ba grupu Persaudaraan Setia Hati Teratai (PSHT), Ikatan Kera Sakti (IKS) no Klibur Oan Rai-Klaran (KORK), hodi bandu totál kontinuasaun ba kualkér atividade.

Rezolusaun ne’e define medida lubun ida-ne’ebé atubele estabelese hikasfali órden públika no hakmatek iha sosiedade, ne’ebé hetan ameasa husi hahalok hirak ne’ebé mak grupu ne’e halo.

Nune’e mós, Parlamentu Nasionál (PN) aprova iha 6 marsu 2017 no Prezidente Repúblika promulga iha 12 abríl 2017, lei númeru 5/2017 19 abríl kona-ba rejime jurídiku prátika Arte-Marsiál no Rituál sira, Arma Branka, inklui Rama Ambon no kinta alterasaun ba Kódigu Penál.

Lei ne’e iha artigu hamutuk 43, ne’ebé hanesan lei espesífika.

Iha tinan-2017 nia laran, PN atualiza lei númeru 5/2017 kona-ba atividade Arte-Marsiál ho finalidade harii Komisaun Reguladór Arte-Marsiál (KRAM) ne’ebé tutela ba Sekretaria Estadu Juventude no Desportu (SEJD).

Lei ne’e mai hodi kriminaliza prátika no ilísitu Arte-Marsiál no prátika rituál sira iha kontestu GAM.

Bainhira implementa ona, entidade sira hanesan FALINTIL-Forsa Defeza Timor-Leste (F-FDTL), forsa seguransa, majistradu sira, ofisiál justisa, funsionáriu Estadu no ajente administrasaun públika mak sei sai responsável ba prevensaun no represaun ba atividade ilísitu sira ne’ebé ko’alia iha lei ho pena prizaun tinan 6 to’o 10.

Lei ne’e rasik hafoin públika, la konsege halo sosializasaun ba komunidade maibé alerta maka’as liu iha atuasaun.

Rekomendasaun KRAM

KRAMharii tuir lei númeru 10/2008 16 jullu, ho objetivu regulariza organizasaun Arte-Marsiál, ne’ebé ninia atividade atu kumpre lei no kontinua mantein pás, estabilidade hodi garantia dezenvolvimentu nasionál ne’ebé sustentável, integradu, períodiku no ekilibradu iha aspetu hotu.

Iha 22 abríl 2019, komisaun ne’e hamutuk ho Sekretáriu Estadu Juventude no Desportu, Nélio Isaac Sarmento relata serbisu komisaun durante tinan-sanulu no aprezenta rekomendasaun relasiona ho GAM, ba Prezidente Repúblika, Francisco Guterres Lú Olo atubele konsidera iha desizaun polítika.

Iha rekomendasaun ne’e KRAM fundamenta katak, laiha razaun atu reativa filafali organizasaun Arte-Marsiál hanesan PSHT, IKS no KORK ne’ebé lei bandu ona.

Tanba ne’e, husu atu organizasaun kompetente sira atu implementa lei ho rigorozu, zero toleránsia ba membru F-FDTL no PNTL ne’ebé envolve direta ka indireta iha atividade GAM ne’ebé lei bandu, la halo instrumentalizasaun GAM ba interese polítiku no kria fasilidade di’ak ba atividade Arte-Marsiál ne’ebé lei legaliza.

PR Lú Olo rasik informa momentu ne’ebá katak kompeténsia atu halo lei hodi bandu ka reativa GAM nu’udar kompeténsia Governu ninian, maibé nu’udar Xefe Estadu, nia parte sei ko’alia ho Primeiru-Ministru atu haree asuntu ne’e ho didi’ak.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here