DILI, 02 fevereiru 2022 (TATOLI)— Diretora Jerál Prestasun Saúde, Ministériu Saúde (MS), Odete da Silva Viegas, informa daudaun ne’e Timor Leste rejista ona kazu konfirmadu pozitivu ba variante Omicron na’in-rua.
“Ita deteta ona kazu konfirmadu pozitivu variante Omicron na’in-rua. Hafoin hetan rezultadu hosi Melbourne-Austrália ne’ebé ita haruka amostra bá, maibé provavelmente kazu pozitivu sira ne’e mós ita bele suspeita ona ba mós variante Omicron mak iha ona transmisaun iha komuniddae nia leet. Maibé ita presiza mós konfirma laboratóriu iha Austrália hafoin ita bele deklara katak Omicron númeru aumenta iha ita-nia rain,” Diretora Jeral ne’e, hateten ba jornalista sira iha armazein SAMES-Kampu-Alor, kuarta ne’e.
Notísia relevante: Variante Omicron da’et lalais liuhosi ema ida ba ema seluk
Nune’e, nia husu husu ba populasaun sira labele pániku tanba variante Omicron ne’e nia transmisaun lais, maibé nia gravidade laiha.
MS husu ba populasaun sira kontinua intensifika nafatin medida prevensaun no labele halibur malu atubele prevene virus ida ne’e.
“Kazu rua ne’e ema sira viajante, maibé ema sira ne’e pasajeiru sira tama mai no sira mós husu halo auto-izolamentu iha uma no na’in-lima mak halo isolamentu iha Lahane. Agora sira halo auto-izolamentu iha uma mak ekipa saúde pilar hitu nia responsabilidade atu halo monitorizasaun ba ema sira ne’e,” Nia informa.
Governu kontinua esforsu hasa’e kobertura vasina nian no husu ba komunidade sira ne’ebé mak seidauk simu vasina doze dahuluk bele hakbesik-an ba fasilidade saúde hodi simu vasina.
Sidadaun sira ne’ebé simu ona vasina kompletu bele iha ona imunidade hodi hatan ba iha varienta foun ka Omicron ne’e.
“Ita-nia preokupasaun mak ba ema sira idozu no ema sira ne’ebé ho moras komplikadu, nune’e ida ne’e ita-nia alerta ba populasaun hodi kolabora hamutuk hodi hakbesik-an ba fatin vasina ne’ebé mak besik hodi hetan sira-nia vasina,” nia afirma.
Ministériu Saúde halo hela esforsu entermús rekursu umanu ne’ebé mak iha tinan 2020 atu kontinua mantein, fasilidade no infraestrutura atu kazu variante foun aumenta bele halo atendimentu di’ak.
Notísia relevante: COVID-19: kazu detetadu foun 159 no ativu 237
Jornalista : Felicidade Ximenes
Editór : Florencio Miranda Ximenes
