Kandidatu PR 2022-2027, Tenente Jenerál Reformadu, Lere Anan Timur. Imajen Tatoli/Francisco Sony.

DILI, 02 fevereiru 2022 (TATOLI)—Kandidatu Prezidente Repúblika Independente 2022-2027, Tenente Jenerál reformadu Lere Anan Timur, hahú rejista ofisialmente iha Tribunál Rekursu, hodi kompete ba Eleisaun Prezidensiál, ne’ebé realiza iha loron 19 marsu tinan ne’e.

Ekipa susesu hamutuk Veteranu no Antigu Kombatente Libertasaun Nasionál, ne’ebé lideradu hosi Cornelio Gama L-7 ba rejista ona kandidatu independete Tanente Jenerál reformadu ne’e ho apoiante 9.000.

“Ha’u hanoin loron ohin espesiál tebes, tanba loron ida ne’e Kamarada Lere ou aman Lere tantu nia halo tinan iha 2022, nune’e mós loron espesiál ba FALINTIL transforma ba F-FDTL no loron ohin mós Tenente Jenerál mai hatama ka rejista ofisiál nian kandidatura iha Tribunál Rekursu no ohin Tribunál simu ona,” portavós ekipa susesu, Vito Simões, ba jornalista sira hafoin submete dokumentu ba Tribunál Rekursu-Caicoli, kuarta ne’e.

Nia dehan, kandidatura Lere Anan Timur fó mensajen importante no hakarak fó agradesementu tomak ba veteranu sira ne’ebé apoia ona nia kandidatuta.

“Hakarak fó agradesiementu tomak aman veteranu sira hotu ne’ebé maka mai hamutuk iha ne’e, ba maun alin, oan hosi veteranu sira hotu, mártir pátria sira hotu, feto faluk sira hotu, estudante sira hotu ne’ebé fó fiar ho laran no fiar iha nia lideransa katak nia sei sai hanesan Prezidente ida ba povu tomak hodi hato’o aspirasaun povu nian hodi lori  prosesu denzenvolvimentu, estabilidade no unidade ba povu ida ne’e,” nia akresenta.

Portavós ne’e hatutan, kandidatura ne’e mós kongratula Primeiru Ministu, Taur Matan Ruak, tanba bele simu ona nian proposta ezonerasaun no Prezidente Repúblika, Francisco Guterres Lú Olo, ne’ebé aseita ona nian proposta ezonerasaun.

Nune’e, Tenente Jenerál Lere sei deklara ofisialmente nian kandidatura iha Munisípiu Ainaru.

“Daudaun ne’e ekipa sei haree hodi prepara, atu loron 5 fevereiru hodi Tenente Jenerál Lere bele anúnsia ofisiál nian kandidatura iha Ainaro,” nia afirma.

Notísia relevante: Kandidatu PR Lú-Olo rejista ona iha Tribunál Rekursu

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here