Prezidente Konsellu Ezekutivu INCT, José Cornélio Guterres. TATOLI/Egas Cristóvão

DILI, 02 fevereiru 2022 (TATOLI)–Institutu Nasionál Sientífiku Teknolojia (INCT, sigla portugés) tinan ne’e deside rasik tópiku peskiza lima ba grupu peskizadór sientífiku sira atu banati tuir.

“Tinan ne’e ita halo mudansa hodi deside rasik tópiku peskiza ne’ebé diferensa ho tinan hirak ba kotuk, uluk peskizadór sira mak deside tópiku maibé dala barak tópiku ne’e simples liu. Tanba ne’e ita maka dezeña rasik tópiku hodi entrega ba peskizadór atu halo tuir de’it,” Prezidente Konsellu Ezekutivu INCT, José Cornelio Guterres, hateten iha ninia knaar fatin, Balide, kuarta ne’e.

Notísia relevante: INCT prevee $75.000 atu halo peskiza iha área hitu

INCT dezeña ona tópiku atu fó ba grupu peskiza 15, maibé iha de’it tópiku haat maka bele fó sai kona-ba oinsá atu rezolve tráfiku iha kapitál Dili.

“Tanba transporte tinan ba tinan aumenta, maibé espasu (estrada) nafatin de’it (la aumenta) inklui kona-ba oinsá Governu ninia antisipasaun ba inundasaun ne’ebé akontese iha kapitál Dili,” nia akresenta.

Tópiku seluk maka Timor-Leste ninia dependénsia ba importasaun sasán hosi li’ur, atu haree oinsá bele minimiza ba importasaun ne’e inklui kona-ba teknolojia tradisionál hanesan produsaun sanan rai, nune’e haree ba oin importante atu kontinua ka lae.

INCT loke programa peskiza sientífiku ne’e ba públiku, maibé espesiál liu ba universidade sira, tanba entidade ne’e iha dosente ne’ebé iha koñesimentu adekuadu atubele realiza peskiza sientífiku ne’e rasik no bele la’o tuir padraun institutu nian.

”Peskiza ne’e ita foku ba dosente sira iha kada universidade, tanba ne’e obrigatóriu. Ne’e duni sira tenke hatama proposta peskiza lalais, ami hahú planu ona semana dahuluk fevereiru ne’e sei anunsia, hafoin kontestante sira sei hatama sira-nia programa peskiza hodi halo avaliasaun molok foti desizaun,” nia dehan.

Enkuantu, iha Governu prevee ona orsamentu ba tinan 2022 ho montante $75.000 ba peskiza 15 iha área hitu no sei fó ba grupu, ne’ebé kada grupu sei hetan $5.000 to’o konklui prodús rezultadu peskiza no aprezentasaun sientífiku.

Jornalista : Tomé Amado  

Editora      : Julia Chatarina  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here