Prezidente Konsellu Ezekutivu INCT, José Cornélio Guterres. Imajen TATOLI/Francisco Sony

DILI, 04 janeiru 2022 (TATOLI)—Institutu Nasionál Siénsia Teknolojia (INCT, sigla portugés) prevee ona orsamentu ho montante $75.000 ba tinan ne’e atu halo peskiza 15 iha área hitu.

Tuir Prezidente Konsellu Ezekutivu INCT, Cornelio Guterres, projetu peskiza tinan ne’e diferente ho peskiza sira ne’ebé halo ona iha tinan hirak liubá.

“Tinan ne’e ita fó liu oportunidade peskiza ba grupu sira, ne’ebé kada grupu tenke lidera hosi doutoramentu ne’ebé iha ona esperiénsia naton iha área peskiza,” Prezidente Konsellu Ezekutivu INCT, hateten ba Agência TATOLI,  iha edifísiu Balide, tersa ne’e.

Notísia relevante: Peskizadór na’in-16 aprezenta rezultadu preliminár ba INCT kona-ba sientífiku-teknolójiku

Área peskiza ne’ebé INCT prepara ona ba grupu peskiza sira atu hili maka inovasaun teknolojia no infraestrutura, edukasaun no informasaun, saúde no bens estar, agrikultura, ekonomia, turizmu no indústria, meiu ambiente no asaun klimátika, no inkluzaun sosiál.

Institutu prevee fundu peskiza ba kada grupu $5.000, ba tinan-ida to’o konklui, prodús rezultadu peskiza no aprezentasaun sientífiku.

“Tanba ne’e kada grupu tenke fihir ninia jestór ne’ebé iha kapasidade no koñesimentu naton atubele organiza projetu peskiza ne’e to’o ramata,” nia akresenta.

INCT sei públika planu peskiza iha área hitu, iha janeiru ikus, hodi fó oportunidade ba grupu peskiza prepara dokumentu inklui bele kompleta dokumentu balun ne’ebé institutu sei prepara.

Aleinde ne’e, institutu hahú ona ninia enkontru ba dahuluk hodi diskute kornograma atu kria giaun ida hodi gia serbisu ba tinan tomak.

“Ami halo ona diskusaun iha enkontru dahuluk  hodi prepara giaun, nune’e bele gia serbisu tuir planu ne’ebé iha. Kornograma ne’e kuandu ramata ona ami sei submete ba Ministériu Ensinu Superiór Siénsia no Kultura atubele iha koñesimentu ba ami-nia serbisu,” nia tenik.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here