Prezidente Konsellu Administrasaun EDTL, E.P, Paulo da Silva, asina kontratu ho Diretór Aitula, Silveiro Pereira Maubere, ba programa eletrifikasaun nasional, iha salaun EDTL, E.P, Caicoli, Imajen TATOLI/Francisco Sony

DILI, 31 janeiru 2022 (TATOLI)–Eletricidade de Timor-Leste, Empreza Públika (EDTL, E.P), segunda ne’e, selebra kontratu ho empreza 17 ne’ebé sai mana-na’in ba programa eletrifikasaun nasionál.

“Asina kontratu ne’ebé ohin ita hala’o ne’e, ninia prosesu konkursu ita halo ona iha fulan hirak ba kotuk, ohin konklui selebra kontratu ho empreza manan-na’in sira hamutuk 17 atu hahú implementa obra iha munisípiu sira,” Prezidente Konsellu Administrasaun EDTL, E.P, Paulo da Silva, hateten, iha Caicoli.

Programa eletrifikasaun nasionál iha faze ne’e ba pakote 44 hodi kobre suku 17 ne’ebé seidauk asesu eletrisidade.

Prezidente Konsellu Administrasaun EDTL, E.P, Paulo da Silva. Imajen TATOLI/Francisco Sony

“Iha pakote dahuluk, kobre pakote 34 ba suku 22, ne’ebé foin atu instala atu asesu eletrisidade, inklui mós ba aldeia balun no ohin ba faze daruak ne’e ita lansa tan ona 44 pakote ne’e kobre ba suku 17. Ne’e hatudu katak suku 50 mak ita atu kobre ona,” nia akresenta.

Notísia relevante: EDTL introdús projetu eletrifikasaun pakote 44 ba empreza interesadu

Aleinde ne’e, sei iha faze tuir mai ba suku 21, ne’ebé daudaun ne’e ekipa téknika sira halo hela levantamentu.

“Espera iha marsu ka abríl tinan ne’e bele konklui ona dezeñu Bill of Quantities (BoQ) atu lansa tan iha suku 21, nune’e bele kobre ona suku hotu no tinan ne’e nia rohan no tinan oin ita tama ba aldeia sira ne’ebé seidauk asesu eletrisidade. Signifika katak implementasaun fízikamente tinan ne’e ita la hotu, maibé prosesu aprovizionamentu ita finaliza hotu kedas iha tinan ne’e, hahú instala, bainhira empreza manan ona tinan ne’e, hahú instala ba suku hotu, tanba ita garante tinan 2023 suku hotu bele asesu ona eletrisidade,” Prezidente Konsellu Administrasaun EDTL, E.P dehan.

Diretór empreza Aitula, Silveiro Pereira Maubere. Imajen TATOLI/Francisco Sony

Iha fatin hanesan, Diretór empreza Aitula, Silveiro Fereira Maubere, ne’ebé hanesan empreza manan-na’in projetu, hateten, empreza ne’e sai ona parseiru EDTL, E.P hahú tinan 2009 to’o agora.

“Ami-nia empreza ne’ebé ohin asina ona kontratu ne’e sei toma konta iha suku Atara, postu administrativu Atsabe munisípiu Ermera, ba totál uma-kain 260, ho totál orsamentu $600.000, ho durasaun implementasaun projetu fulan-lima. Ami garnte katak sei ezukuta projetu ne’e ho di’ak,” nia otimista.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here