Asaun jogadór avansadu Indonézia, Ronaldo Kwateh (10) iha klaran, iha jogu amigavél Internasionál FIFA entre ekipa Lafaek no Garuda, Indonézia vs Timor-Leste, iha Estadiu I Wayan Dipta, Gianyar, Bali, domingu (30 januari 2022. Imajen/ANTARA.

DILI, 30 janeiru 2022 (TATOLI)–Ekipa Lafaek Timor-Leste U-23 la konsege konkista nia vitória iha jogu amigavél Internasionál FIFA iha faze daruak, Timor-Leste kontra Indonézia,  iha Estádiu I Wayan Dipta, Gianyar, Bali, Indonézia, domingu kalan ne’e.

Notísia Relevante: Jogu amigavél, Timor-Leste derrota ho Indonézia 4-1

Hosi rezultadu jogu fraze daruak ne’e, Timor-Leste tenke lakon ho eskore 0-3 no iha jogu faze dahuluk ne’ebé hala’o iha 27 janeiru ne’e Timor-Leste derrota ho eskore 1-4 ho totál golu hosi jogu hirak ne’e hamutuk 7-1.

Bainhira jogu hahú, ekipa Lafaek no Garuda hahú lansa kedan kontra no atake ba malu tuir ida-idak nia tékniku no abilidade atu buka hatama golu, atu bele fó vitoria ba ida-idak nia nasaun.

Ekipa rua ne’e hatudu jogu ho forsa ne’ebé hanesan, maibé ekipa Indonézia halo kontra no atake ho rítmu ne’ebé makaas halo Timor-Leste book an susar uitoan. Maske ladún hetan oportunidade maibé ekipa Timor-Leste nafatin mantein iha nia pozisaun hodi halao jogu ho modelu ofensivu no maiória defensivu tanba adversáriu lansa kontra-atake ne’ebé suli ho rítmu lais be lais.

Ekipa Timor-Leste atu satan bola mós la biban, entaun biban tomak domina hosi jogadór Indonézia Terens Puhiri (5) lansa kedan golu dahuluk iha minutu lima (5) hodi hatuur rezultadu provizóriu ho eskore 1-0.

Jogu hahú manas liután tanba ekipa Timor-Leste mós esforsu hodi bok an lais maske la konsege hetan oportunidade atu hatama golu, tanba jogadór Indonézia ho tékniku jogu ne’ebé lais konsege hamate tutuir sira nia jogu.

Avansadu Mozinho de Lima (10) no Paulo Gally (21) hamutuk ho kolega sira halo lansa barak ba guarda rede Indonézia nian maibé sutu hirak ne’e nunka kona iha alvu.

Ho nune’e, treinadór Timor-Leste la satisfaa ho jogu ne’ebé jogadór sira hala’o iha kampu laran no nia hakilar makas hodi hakat sai hosi liña ne’ebé nia laiha direitu hamrik bá ne’e, nune’e árbitru foti desizaun hodi fó kartaun kinur ba treinadór refere.

Maibé jogu nafatin la’o maibé oportunidade boot monu liu ba ekipa Indonézia nia liman tanba iha minutu 31, jogadór Indonezia Ricky Gambuaya (15) lansa sutu ida ba guarda rede Timor-Leste nain maibé sei salva hosi guarda rede Genildo Pereira (1).

Maibé liu de’it minutu tolu iha minutu 33, jogadór Indonezia Marcelino (7) lansa tan sutu ida maibé sutu ne’e sei halai ses hosi alvu.

Ekipa rua nafatin luta hodi hametin ida-idak nia dignidade maibé Timor-Leste labele halo buat ida tanba ekipa Indonézia mak domina liu bola iha kampu laran halo jogadór ekipa Timor-Leste nian halai to’o nanál badak-naruk.

Ho nune’e, iha minutu 41 jogadór Indonezia Ramai (13) hatama tan golu ida ho rezultadu golu sai 2-0, no hosi golu ne’e mak termina ekipa rua nia jogu iha primeira parte tanba to’o jogu minutu 45 termina laiha tan golu ruma mak akontese Indonézia provizóriu lidera 2-0.

Hakat ba segunda parte, ekipa rua nafatin hatudu jogu, Indonézia jogu ladún esforsu tanba lidera ona jogu, Timor-Leste nafatin esforsu maibé esforsu hirak ne’e hela de’it hanesan naran tanba la hatama golu ruma no la halo ameasa ba guarda rede Indonézia nian.

Nune’e iha minutu 72 oportnidade monu tan ba Indonezia nia liman, liuhosi jogadór Ricky Gambuaya (15) hatama tan golu ida hatuur rezultadu ba 3-0.

Rezultadu ne’e mak hakotu jogu ba ekipa rua tanba to’o minutu 45 ikus ne’e ramata, laiha tán golu ruma mak ekipa rua ne’e prodús, nune’e ekipa Indonézia foti ulun no hatudu sira-nia hirus matan sai mana-na’in no ekipa Timor-Leste hele ho derrota.

Ekipa Timor-Leste lidera hosi treinadór Brazileiru Fabio Joaquim Maciel da Silva no Indonézia nian lidera hosi Shin Tae-yong hosi Korea Súl.

Jogu ba ekipa rua ne’e hanesan jogu amigavel Internasionál FIFA hodi koko Timor=Leste nia forsa atu ba tuir jogu iha AFF U-23 ne’ebé sei hala’o iha fevreiru iha Cambodia no Indonézia tenke joga hakaas an atu hadi’a sira nia renking iha FIFA ne’ebé tun tebes iha tinan sira ikus ne’e.

Jornalista : Hortencio Sanchez

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here