Kontra no atake ekipa Lafaek no Indonezia. imajen/Foto google

DILI, 27 janeiru 2022 (TATOLI)– Ekipa Lafaek U-23 derrota iha jogu amigavel, ne’ebé hala’o iha Estádiu I Wayan-Dipta Stadium, Gianyar Bali, kinta kalan ne’e, kontra ekipa Indonézia ho rezultadu eskore 4-1.

Bainhira minutu primeiru hahú ekipa rua lansa kedan kontra no atake ba malu atu buka hatama golu, maibé tekniku no abilidade ekipa rua nian kontinua iha forsa ne’ebé hanesan.

Notísia relevante:  Ekipa Timor-Leste ho Indonézia adia jogu amigavél

Ekipa uma-na’in la fó fatin ba ekipa lafaek, maibé ekipa la’o rai mantein nia pozisaun hodi la fó fatin ba ekipa “merah putih” ne’e tama hodi halo golu.

Timor-Leste no Indonezia. imajen/google

Haree ba ritmu jogu ne’ebé la’o makas ekipa Timor-Leste komesa domina bola makas iha minutu 30 ba leten nune’e iha minutu 34 avansadu Paulo Gally Freitas (21) hetan oportunidade di’ak liu hosi jogu individu fera rede Indonézia muda kedan rezultadu ba 1-0.

Hosi golu ne’e halo Indonézia nia mentalidade monu kedan iha minutu primeira parte maibé ekipa ne’e nafatin esforsu to’o minutu primeiru termina rezultadu provizóriu 1-0.

Dolar ba segunda parte ekipa rua nafatin hala’o jogu ho rítmu ne’ebé makas, maibé Indonézia konsege rekupera hikas nia estamina hodi luta ho ambisaun atu hatama golu.

Esforsu hirak ne’e la hela de’it hanesan esforsu tanba iha minutu 65 jogadór Indonezia Ricky Kambuaya lansa ona golu ida muda rezultadu ba 1-1.

Golu ne’e, hamate kedan timoroan sira nia esforsu tanba tátika barak mak sira halo la oferese golu ruma ba sira.

Ho oportunidade ne’ebé di’ak Indonezia uza kedan oportunidade iha minutu 73 Prataman Arhan lansa tan golu ida tanba jogadór Timor-Leste Gumario Morreira (13) halo fallansu iha lina oin árbitru iha kompetensia foti kedan penalidade fó ba Indonézia muda rezultadu ba 2-1.

Indonézia nia ritmu jogu sa’e makas nune’e halo timoroan sira jogu la ho ona konsentrasaun nune’e iha minutu 77 jogadór Timor -Leste Mendonsa da Silva la kontrola ho di’ak halo auto golu nune’e bola tama direita ba rede Timor-Leste rezultadu ba Indonézia 3-1. La’ós ne’e de’it iha minutu 80 defeza Filomeno Junior da Costa halo fallansu hodi hatama rasik golu ba Timor – Leste nia baliza muda rezultadu ba 4-1 too jogu termina Indonezia mak hetan votoria.

Istória hakerek ona tanba hahú Timor-Leste haksumik-an hosi Indonézia durante sira nia ukun tinan 24 nia laran hosi 2002 to’o agora Timor-Leste seidauk manán Indonezia no ida ne’e sai ona istória ba ekipa rua ne’e.

Maibé, jogu amigavel ba ekipa rua ne’e sei la hotu de’it iha ne’e 30 janeiru mai ne’e ekipa rua sei hasoru malu dala ida tan iha fatin ne’ebé hanesan.

Jogu ne’e hanesan meiu ida ba Timor -Leste hodi koko nia forsa ba jogu AFF Championship ne’ebé sei hala’o iha Cambodia fevereiru mai ne’e.

Notísia relevante:  FFTL kontaktu ona Indonézia halo jogu amigavél 

Jornalista : Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here