Kandidatura Prezidente Repúblika tinan 2022-2027 hosi Prtidu Repúblika Demokrátiku Timor (PDRT), Anacleto Bento Ferreira. Imajen Tatoli/Francisco Sony

DILI, 30 janeiru 2021 (TATOLI)— Partidu Demokrátiku Repúblika Timor (PDRT), liuhosi Konferénsia Nasionál daruak, domingu ne’e, deside kandidata Anacleto Bento Perreira, hodi kompete iha Eleisaun Prezidensiál, ne’ebé realiza iha loron 19 marsu tinan ne’e.

“Ami realiza konferénsia hodi halo aseitasaun ba ami nian kandidatura Anacleto Bento Perreira, agora ami deklara, tempu besik ami lori kandidatura ne’e ba rejista iha Tribunál Rekursu,” Prezidente Partidu Demókratiku Repúblika Timor (PDRT), Agostino Gomes, hateten ba jornalista sira hafoin ramata konferénsia iha sede Komisaun Nasionál Eleisaun (CNE, sigla portugés), Colmera, domingu ne’e.

Prtidu Repúblika Demokrátiku Timor (PDRT), realiza kongresu konferensial hodi hili kandidatura Prezidente Repúblika tinan 2022-2027. Iha salaun CNE Dili, domingu (30/01). Imajen Tatoli/Francisco Sony

Daudaun ne’e, PDRT iha ona faze preparasaun hodi rekolla kartaun eleitorál atu sai apoiante ba kandidatura Prezidente Repúblika ne’e.

“Ami akumula 6.000-resin, tanba tuir lei kada munisípiu tenke hetan apoiante 100 no nasionál tenke akumula 5.000. Maibé ami prenxe ona rekezitu, nune’e tempu badak aprezenta kandidatura ba Tribunál Rekursu,’ nia akresenta.

Prezidente PDRT ne’e iha esperansa katak nia-kandidatura hetan mós votu konfiasa hosi sidadaun sira iha eleisaun prezidensiál tinan ne’e.

PDRT avansa ho nian kandidatura rasik ho objetivu atu hatuur hikas konstituisaun RDTL tuir nia dalan.

“Naturálmente, ami hakarak manán, maibé se karik derrota. Maibe ami hanoin situasaun polítika ida agora ne’e laiha kandidatu ida manán iha primeira ronde, nune’e bainhira tama ba segundu ronde,  ami la ultrapasa no partidu ruma hakarak husu ami kolega ho sira ami apoia. Maibe ami nia ezijénsia mak tenke hatuur konstitusaun tuir fali nia dalan,” nia espera.

Alende ne’e, iha Konferénsia Nasionál daruak PDRT ne’e konferensista sira deside liuhosi votu aklamasaun hili,  Agostinho Gomes nuudar Prezidente PDRT hodi troka Prezidente PDRT sesante Anacleto Bento.

Prezidente Agostinho, dehan prioridade ba tinan lima mak esforsu makas hodi hetan asentu iha Parlamentu Nasionál iha Eleisaun Parlamentár tinan oin.

“Iha Timor-Leste ita hotu hatene problema dezempregu sempre sai kestaun, karik PDRT daudaun ne’e povu fó fiar ba reprezenta povu iha pralamentu sei ko’alia ida ne’e no fó prioridade ba kestaun seluk,” nia akresenta.

Nune’e, PDRT hahú konsolida forsa hodi hasoru Eleisaun Parlamentár tinan oin liuliu haforsa estrutura hosi baze to’o mai nivé nasionál.

Maski, partidu PDRT ne’e identiku ho Colimau 2000, naibé promote sei la halo serbisu Colimau 2000, tanba partidu ne’e buka atu hakuak ema hotu hodi kontribui ba dezenvolvimentu.

Notísia relevante:   Kandidatu Ramos Horta rejista ona iha Tribunál Rekursu

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here