Vise-Ministru Edukasaun, Juventude no Desportu, Antonio Guterres. Imajen TATOLI/Francisco Sony

DILI, 28 janeiru 2022 (TATOLI)—Ministériu Edukasaun Juventude no Desportu (MEJD) daudaun ne’e prepara hela parte téknika atu aselera prosesu elaborasaun kurríkulu rekorrente ba sekundáriu no halo estudu termu ka enkuadramentu legál atubele halo preparasaun ba enkontru sira.

“Ha’u hanoin kurríkulu rekorrente ba nível ensinu sekundáriu daudaun tama hela iha faze preparasaun, maibé ba nível ensinu báziku hosi primeiru to’o terseiru siklu elabora hotu ona. Ensinu sekundáriu maka ita planu ba tinan 2022, ne’ebé iha hela prosesu elaborasaun kurríkulu,” Vise-Ministru Edukasaun Juventude no Desportu, António Guterres, relata ba Agência TATOLI, via telefónika, sesta ne’e.

Notísia relevante: TLCE husu Governu elabora kurrikulum nível sekundáriu iha ensinu rekorrente

Tuir governante ne’e, MEJD kontinua de’it prosesu ne’ebé antes ne’e iha ona no asuntu ne’e hanesan prioridade.

“Ami mai iha tinan 2020 atu kontinua hatutan esforsu elaborasaun kurríkulu. Tanba ami haree katak asuntu ne’e prioridade duni atu hasa’e nível rekorrente ba ensinu sekundáriu, ne’ebé la loos kestaun foin hanoin, ne’ebé to’o ona iha tempu ida-ne’e tenke avansa ba oin,” nia akresenta.

Nune’e, Vise-Ministru kompromete katak tinan ne’e sira tenke implementa, tanba ne’e halo hela esforsu atu atinje kompromisu ne’ebé hatuur ona iha planu no programa sira.

“Ko’alia kona-ba enkuadramentu legál tenke halo mós alterasaun ba dekretu-lei sira no prosesu ne’e tenke submete ba leten hodi hetan desizaun ruma. Ne’e duni elaborasaun kurríkulu ba ensinu sekundáriu nu’udar nesesidade ne’ebé sai ezijénsia ida tanba maluk barak mak kestiona. Tanba ne’e MEJD kria ekipa téknika atu halo serbisu,” nia dehan.

Tuir Vise-Ministru, prosesu elaborasaun rasik ninia kompeténsia kabe ba responsabilidade Diresaun Nasionál Ensinu Rekorrente no ba prosesu ne’e presiza fundu.

Tuir dadus hosi MEJD, hahú tinan 2015 to’o 2020 bainhira estabelese edukasaun nível ensinu rekorrente, konsege atinje númeru estudante finalista hosi ensinu báziku siklu 1,2 purvolta 838, kompostu hosi feto 314 no mane 524.

Hosi totál númeru ne’e iha mós ema ho defisiente 45, kompostu feto 18 no mane 27 mak gradua ona hosi programa ensinu rekorrente.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here