Koordenadór Nasionál TLCE, José Monteiro. Foto : Pájina TLCE

DILI, 27 janeiru  2022 (TATOLI)-Koordenadór Nasionál Timor-Leste Coalition for Education (TLCE), José  Monteiro, husu Ministériu Edukasaun Juventude no Desportu (MEJD) atu elabora kurrikulum nível sekundáriu iha ensinu rekorrente, tanba prosesu aprendijazen foin iha ekivalénsia ensinu báziku nian.

“Ita presiza duni elabora kurikulum foun ba ensinu rekorrente nível sekundáriu nian, nune’e sidadaun ne’ebé ramata ensinu rekorente kontinua ensinu superiór, tanba durante ne’e sira para de’it iha ensinu báziku, entaun estudante barak hein atu hetan oportunidade hodi bele asesu ba sertifikadu nível ensinu sekundáriu ni’an“, dehan Koordenadór TLCE, José Monteiro ba Agência Tatoli, hosi via-telefone.

José apresia planu Governu elabora kurrikulum ba ensinu rekorrente iha nível ensinu sekundáriu. Planu ka programa ida-ne’e importante atu tulun estudante sira ne’ebé abandona estuda iha nível sekundáriu.

“Ha’u hanoin ida ne’e pasu di’ak tebes, espera bele finaliza lalais, nune’e bele implementa iha tinan ikus ne’e”, hateten.

Koordenadór lembra TLCE antes ne’e halo monitorizasaun ba instalasaun sentru komunitáriu iha nível munisípiu to’o postu administrativu sira, maibé balun funsiona no balun la funsiona, hanesan iha Munisípiu Liquiça no Lautém.

Nia esplika razaun sentru komunitáriu balun ne’ebé la funsiona hodi kontinua prosesu ensinu rekorrente, tanba menus partisipante no manorin hosi Ministériu Edukasaun, tanba ne’e projetu ne’e laiha konsisténsia.

TLCE hanesan koligasaun no rede ba Organizasaun Sosiedade Sivíl sira hakarak servisu ba Desenvolvimentu Edukasaun Timor-Leste ne’ebé harii husi Organizasaun naun Governamentál lokál no Sindikadu Profesor sira Timor-Leste (SPTL) iha loron 09 outubru 2009 ho membru iha Munisipiu 12 inklui Rejiaun Adminnistrativa Espesiál Oe-Cusse Ambeno (RAEOA).

Objetivu TLCE asegura edukasaun ba ema hotu, iha alokasaun orsamentu jerál Estadu ne’ebé adekuadu ba setór edukasaun, fornesimentu servisu edukasaun ne’ebé  iha kualidade, efetivu no efisiénsia, partisipasaun inan aman hodi asegura labarik otas eskola asesu no kontribui ba hasa’e kualidade edukasionál.

Tuir Konstituisaun RDTL, artigu 59 alinea 1 to’o 2 garante sidadaun hotu nia direitu ba edukasaun no kultura, nune’e harii sistema ensinu báziku universál katak ema hotu iha direitu hanesan ba eskola no formasaun servisu-profisaun nian.

“Ita mós adopta konvensaun internasionál  signifika  ita nia joven sira ne’ebé eskola iha ensinu ekivalénsia, sira bele hetan oportunidade hafoin hetan sertifikadu hanesan ho ensinu formál sira, nune’e sira bele asesu ensinu superior no bele uza sertifikadu hanesan mós nesessidade”, konklui.

Jornalista: Celestina Teles

Editór       : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here