Kandidatu Prezidente Republika, Armanda Berta dos Santos. Imajen Tatoli/Francisco Sony.

DILI, 28 janeiru 2022 (TATOLI)- Tribunál Rekursu haruka fila kandidatu Prezidente Repúblika hosi Partidu Kmanek Haburas Unidade Nasionál Timor Oan (KHUNTO), Armada Berta dos Santos, tanba seidauk prenxe rekezitu balun tuir lei.

“Ohin ami seidauk rejista ami nia kandidatura Armanda Berta dos Santos tanba  Tribunál Rekursu haruka ami kompleta dokumentu balun hafoin lori mai fali rejista,” Prezidente ekipa susesu kandidatura Prezidente Repúblika 2022-2027 Armanda Berta dos Santos, Marito Magno ba jornalista sira iha edefísiu Tribunál Rekursu-Caicoli, sesta ne’e.

Nia dehan Tribunál Rekursu haruka fila dokumentu kandidatu Armanda Berta dos Santos, tanba dokumentu lista apoiante ne’ebé ekipa susesu lori mai  aprezenta ba Tribunál Rekursu ne’e manuál de’it, nune’e Tribunál Rekursu husu prezisa kompleta tan dokumentu ho eletróniku.

“Dokumentu ohin mai manuál ka hard copy, maibé Tribunál Rekursu presiza dokumentu eletrónika ka soft copy, tanba ne’e maka haruka fila dokumentu sira, no agora ami esforsu hela atu kompleta fali  dokumentu  apoiante sira ne’e ba iha soft copy, nune’e tuku 15:00, lokraik ne’e, ami mai fali rejista,” Marito Magno dehan.

Koordenadór ekipa susesu ne’e dehan Armanda Berta Dos Santos kandidata-an ba Prezidente Repúblka ho forsa polítika ka ho apoiante hamutuk 8.641 hodi Munisípiu 12 inklui Rejiaun Administrativu Espesiál Oé-Cusse no Ambeno (RAEOA).

Nune’e, nia dehan iha esperansa bo’ot lori sira nian kandidatura Prezidente Repúblika ne’e manán iha eleisaun Prezidensiàl tinan ne’e.

“Ami ekipa susesu iha esperansa katak kandidatura sei hetan rezultadu pozitivu no sei fó supreza ba povu Timór laran tomak,” Marito Magno hateten.

Notísia relevante:  Armanda Berta kandidata an ba PR hametin Estadu direitu demokrátiku

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

1 KOMENTÁRIU

HAKEREK NO HATÁN

Please enter your comment!
Please enter your name here