Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Francisco Sony

DILI, 27 janeiru 2022 (TATOLI)–Governu promove kampaña limpeza jerál iha territóriu laran tomak hodi promove surtu dengue, tanba haree ba evolusaun kazu dengue kontinua aumenta kada loron. 

“Governu sei promove asaun limpeza jerál iha nível nasionál, hahu aban,  loron 28 janeiru 2022, durante loron tomak ne’ebé sei hala’o hosi funsionáriu orgaun no servisu administrasaun públika hotu. Apela atu mobiliza populasaun tomak, liuliu organizasaun sosiedade sivil no eskola sira hamutuk hodi halo limpeza jerál iha fatin públiku no iha idaidak ninia uma,” Ministru Prezidénsia Konsellu Ministru, Fidelis Manuel Leite Magalhães, hateten, iha Palásiu Governu, kinta ne’e.

Notísia relevante: Laiha estoke aimoruk rega susuk, dengue hamate labarik na’in-18

Kampaña ba limpeza hanesan parte ida hodi kombate surtu dengue iha Timor-Leste, ne’ebé daudaun ho totál kazu rejistadu 972 no mate na’in-18.

Tuir dadus ne’ebé fó sai horiseik hosi Ministériu Saúde, Dili hanesan munisipiu ne’ebé afetadu liu, ho totál kazu hamutuk 648.

“Ministériu Administrasaun Estatál sei fó-sai ba orgaun no servisu administrasaun públika sira, kona-ba organizasaun no distribuisaun ekipa sira ba limpeza jerál,” nia akresenta.

Enkuantu, iha sorumutuk tuirmai, Konsellu Ministru sei delibera kona-ba kontinuidade medida.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here