Adjuntu Sekretariu Jerál FFTL, Frederico Martins. Imajen Tatoli/ Hortencio Sanches

DILI, 17 janeiru 2022 (TATOLI) – Adjuntu Sekretáriu Jerál Federasaun Futeból Timor-Leste (FFTL), Frederico Martins, informa, FFTL komunika ona ho nasaun Indonézia atu realiza jogu amigavél entre selesaun nasionál Timor-Letse ho selesaun Indonézia, iha loron 24 no 27 janeiru ne’e.

Preparasaun jogu amigavél ne’ebé sei realiza iha Indonézia ne’e ho objetivu atu prepara ekipa Timor-Leste nia kbiit ba partisipa iha jogu Asian Football Federation (AFF) U23, ne’ebé sei realiza 14 to’o 26 fevereiru 2022.

“Antes ne’e, ita planu atu ba hala’o treinamentu iha nasaun Qatar (Uni Emirate Arabe), maibé tanba kestaun omicrom ne’ebé sa’e makas iha ne’ebá entaun sira nia Governu la autoriza ita. Nune’e, ita buka dalan seluk tenta ko’alia ho Indonézia ne’ebé agora pozitivu ba hala’o jogu amigavél iha ne’ebá hodi koko ita nia forsa,” dehan Frederico ba Agência TATOLI iha edifisiu FFTL Dili, segunda ne’e.

Notísia relevante:Fabio garante “ekipa lafaek” sei hatudu jogu di’ak iha AFF CUP 2022

Tanba ne’e, FFTL hahú prepara ona dokumentu lubuk ida hodi haruka ba Indonézia atubele autoriza selesaun U-23 sira bá halo jogu amigavél ne’e.

“Dokumentu sira ohin ami prepara ona, maibé iha jogadór balun nia pasaporte atu mate ona, nune’e sira sei ba trata hela atu ita bele kompleta, tanba hosi Indonezia fó hatete mai ita imigrasaun ne’e tarde liu loron tolu, ne’ebé aban ita tenke kompleta ona dokumentu sira,” nia dehan.

Nia dehan, bainhira dokumentu kompleta ona selesaun U23 sei aranka ba Jakarta iha loron 20 janeiru.

“Ita tenta ho jogu amigavél hanesan ne’e ho nasaun tolu ka haat, no ita sei hela de’it iha Indonézia halo treinamentu to’o 12 fevereiru mak aranka ba fali Cambodia,” nia akresenta. relata.

Daudaun ne’e, jogadór selesaun nasional U23 na’in-27 kompostu hosi guarda rede na’in tolu.

Treinadór prinsipál Fabio Joaquim Maciel da Silva, daudaun akompaña hela no fó treinamentu ba jogadór sira iha kampu FFTL Dili.

Notísia relevante: Timor-Leste tama grupu A iha AFF CUP 2022

Jornalista : Hortencio Sanchez

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here