Universidade Nasionál Timor-Lorosa’e (UNTL). Imajen TATOLI/Francisco Sony

DILI, 27 janeiru 2022 (TATOLI)—Akadémiku Universidade Nasionál Timor-Lorosa’e (UNTL), Diretór Departamentu Dezenvolvimentu Komunitária, Januário Soares, konsidera Ministériu Edukasaun Juventude no Deportu (MEJD) presiza kria ekipa méritu ida hodi elabora kurríkulu ensinu rekorrente iha nível sekundáriu.

“Ha’u hanoin ida-ne’e maka posibilidade hodi hetan progresu di’ak ba eleborasaun kurríkulu rekorrente ba ensinu sekundáriu, se ministériu la kria ekipa ida maka difísil atu elabora kurríkulu ho di’ak,” Akadémiku ne’e hateten ba Agência TATOLI, via telefónika, kinta ne’e.

Notísia relevante: MEJD halo preparasaun elabora kurríkulu rekorrente ensinu sekundáriu

Nune’e, nia hameno ba MEJD atu tau-atensaun maka’as ba kurríkulu rekorrente, tanba kestaun ne’e mak sai save importante no sasukat  ba kualidade  ensinu aprendizajen, tanba ne’e presiza halibur hamutuk péritu sira atu kria kurríkulu hodi alkansa objetivu edukasaun iha Timor Leste.

“Kestaun ne’e importante ba ema sira ne’ebé eskola paradu (putus sekolah), maibé agora sai konfuzaun tanba balun adapta ba kurríkulu Indonézia, balun Europa no depende ba kargu polítiku troka malu kaer ministériu. Ezemplu ministru ida eskola iha Austrália, bainhira nia asume kargu, nia uza kurríkulu ne’ebá nian,” nia akresenta.

Iha parte seluk, Dekanu  Fakuldade Siénsia Sosiál hosi UNTL, Camilo Ximes, hateten, elaborasaun kurríkulu ba ensinu rekorrente ne’e hanesan inisiativa di’ak, maibé presiza halo estudu no investigasaun kle’an.

“Ita hotu hateten katak, hafoin Timor-Leste restaura independénsia, ita fó prioridade ba eskola pré-primária to’o universidade ka naun formál. Tanba ne’e, molok foti desizaun MEJD presiza envolve espesialista sira hodi halo kurríkulu ne’ebé di’ak no tuir duni nesesidade ensinu rekorrente,” nia hato’o.

MEJD identifika ona númeru estudante na’in-300 resin maka la konsege akaba estudu iha nível ensinu sekundáriu, tanba ne’e MEJD planeia kria kurríkulu.

Nune’e, iha tinan 2021 ministériu kria ona planu no programa atu elabora kurríkulu ba ensinu rekorrente nível ensinu sekundáriu, nune’e bele tulun estudante ne’ebé abandona estudu iha nível sekundáriu, atu hetan diploma hodi kontinua asesu ba nível universidade.

Tuir Konstituisaun artigu 59 aliña 1-2, garante sidadaun hotu nia direitu ba edukasaun no kultura, nune’e harii sistema ensinu báziku universál, atu ema hotu iha direitu hanesan ba oportunidade.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here