Kondisaun Mota Welolo bainhira tempu udan. Imajen/Espesiál

DILI, 25 janeiru 2022 (TATOLI)–Iha tempu udan kondisaun Mota Welolo impede movimentu komunidade, liuliu estudante Pre-Eskolár Unidu Welolo iha aldeia Uma-boot, suku Luka,  postu administrativu Viqueque villa, munisípiu Viqueque, asesu ba eskola no obrigadu hapara prosesu aprendizajen.

“Mota Welolo sai ami-nia preokupasaun boot, tanba bainhira tempu udan bainhira mota tun, ami labele bá eskola. Entaun ami tenki deside hapara totál prosesu aprendizajen. Tanba ne’e, ha’u hakarak husu ba Governu liuhosi ministériu relevante atu normaliza Mota Welolo hodi fasilita ami manorin no estudante sira asesu eskola, tanba bainhira la halo lalais sai difikuldade nafatin ba ami, liuliu  iha tempu udan,” Profesora Pre-Eskolár Unidu Welolo, Joanina Gonzaga Soares Pinto, informa ba Agência TATOLI, via telefónika, tersa ne’e.

Notísia relevante: Autoridade Lacluta husu Governu normaliza ponte Dilor no Welolo

Nia dehan, antes ne’e Institutu Jestaun Ekipamentu, Institutu Públiku (IGE, I.P, sigla portugés) destaka ona ekipamentu iha Mota Welolo, maibé to’o agora seidauk normaliza mota.

Dalan liga ba Ponte Welolo. Imajen/Espesiál

“Hosi Mota Welolo ne’e laiha dalan alternativu ruma hodi fasilita profesór, estudante no komunidade, tanba dalan úniku maka hakur mai mota atu asesu ba eskola,” nia akresenta.

Iha fatin ketak, Diretór servisu Ministériu Obra Públika (MOP), Mario do Rego, informa, kondisaun ne’e sempre akontese kada tinan, ne’ebé bainhira mota tun liu metru 50 lori rai henek taka tomak ponte okos.

“Entaun, bee tenki liuhosi dalan hodi okupa dalan hosi ponte to’o ninia rohan kuaze metru 300. Nune’e, sai perigu ba komunidade sira vida,” nia tenik.

Ba kestaun ne’e, MOP Viqueque hato’o ona ba parte IGE, I.P hodi normaliza, maibé to’o agora seidauk.

“Ha’u la hatene loloos bainhira maka IGE, I.P halo intervensaun ba Mota Welolo, sira destaka ona ekipamentu, maibé to’o agora seidauk hala’o serbisu. Ha’u mós hatene iha mota ne’e bainhira tempu udan komuidade sira labele ultrapasa tanba dalan alternativu mós laiha,” nia dehan.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here