Xefe Estadu Maiór Jenerál F-FDTL, Tenente Jenerál Lere Anan Timur. Imajen TATOLI/António Gonçalves

DILI, 24 janeiru 2022 (TATOLI)— Ministru Defeza (MD), Filomeno da Paixão de Jesus, informa, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Lere Anan Timur, hato’o-nia pedidu lisensa iha semana kotuk atu hala’o atividade sivíl, hodi hein Prezidente Repúblika Francisco Guterres ‘Lú-olo’ dekreta nia-pedidu reforma hosi instituisaun F-FDTL.

“Nia (Tenente Jenerál Lere Anan Timur) la abondona serbisu, maibé nia husu duni lisensa durante loron hira nia laran tanba trata asuntu privadu balun hodi hein Prezidente Repúblika dekreta nia-karta reforma,” Ministru Paixão hateten ba jornalista sira hafoin ramata audénsia ho Primeiru Ministru Taur Matan Ruak iha Palasiu Governu, segunda ne’e.

Notísia relevante: Kandidata an ba PR, Lere submete ona karta reforma ba Governu

Ministru Defeza, Filomeno da Paixão de Jesus. Imajen TATOLI/Egas Cristóvão.

Governante ne’e dehan lisensa ne’e Tenente Jenerál Lere hato’o iha semana ida ba kotuk, maibé funsionamentu instituisaun F-FDTL kontinua la’o di’ak.

“Ha’u sente prosesu lisensa ne’e ho durasaun kleur, maibé ida ne’e laiha buat ida tanba servisu institusaun F-FDTL, daudaun ne’e halo hosi Vise Xefe Estadu Maiór Jenerál F-FDTL, Majór Jenerál Falur Rate Laek, ne’ebé laiha problema ruma,” Governante ne’e garante.

Governu liuhosi desizaun koletiva Konsellu Ministru (KM), aprova proposta ezonerasaun no nomeasaun ba kargu xefia FALINTIL-Forsa Defeza Timor-Leste (F-FDTL).

Desizaun ne’e ligadu ho pedidu reforma hosi Xefe Estadu Maiór Jenerál F-FDTL, Tenente Jenerál Lare Anan Timur.

Nune’e, Konsellu Ministru hala’o sorumutuk estraordináriu hodi delibera no propoin ba Prezidente Republika, atu ezonera Tenente Jenerál Lere Anan Timur, hosi kargu Xefe Estadu Maiór Jenerál Forsa Armada.

Aleinde ne’e, proposta ne’e inklui ezonera Majór Jenerál Falur Rate Laek, hosi Kargu Vise-Xefe Estadu Maiór Jenerál Forsa Armada no nomesaun Majór Jenerál Falur Rate Laek, ba Kargu Xefe Estadu Maiór Jenerál Forsa Armada, nomesaun Brigadeiru Jenerál Calisto dos Santos Coli ‘Coliati’, ba Kargu Vise-Xefe Estadu Maiór Jenerál Forsa Armada.

Nune’e mós, mantein nomeasaun Komodoru Pedro Klamar Fuik, ba Kargu Xefe Estadu Maiór Forsa Armada, ne’ebé molok foti desizaun ikus sei konvoka reuniaun Konsellu Superiór Defeza no Seguransa.

Tenente Jenerál Lere Anan Timur lidera F-FDTL durante tinan-haat, hahú 2015 to’o 2019, hafoin prolonga ka estende tan.

Notísia relevante: Governu aprova proposta ezonerasaun no nomeasaun kargu xefia F-FDTL

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here