DILI, 23 janeiru 2022 (TATOLI)—Partidu Congresso Nacional de Reconstrução de Timor (CNRT), domingu ne’e, realiza konferénsia nasionál hodi deside kandidatura hosi partidu atu kompete iha Eleisaun Prezidensiál períodu 2022-2027, ne’ebé sei realiza iha loron 19 marsu tinan ne’e.
Liuhosi biban ne’e konfrensista sira deside Líder istóriku, José Ramos Horta, hodi kandidata-an ba Prezidente Repúblika (PR).
“Rezolusaun ida hosi konferénsia nasionál ne’e deside kandidatura ne’ebé ami hili, maka José Ramos Horta,” Prezidente CNRT, Kay Rala Xanana Gusmão, deklara iha salaun Oka, Osindo 1.
Notísia relevante: Tribunál Rekursu simu lista kandidatura PR to’o 04 fevereiru
Nune’e, ba konfiansa ne’e, partidu CNRT husu Horta bainhira asumi kargu nu’udar PR, tenke kumpre rekezitu neen hanesan respeita no halo tuir de’it saida maka Konstituisaun Repúblika Demokrátika Timor-Leste (RDTL) haruka, komprometidu atu hatuur fali orden konstitusionál ne’ebé partidu CNRT konsidera polítiku sira sobu no estraga ona.
Husu mós PR eleitu atu komprometidu hatuur hikas lejitimidade no dignidade orgaun Parlamentu Nasionál, komprometidu atu restaura fali lejitimidade no funsiona normál orgaun Governu ne’ebé konsidera dezde tinan 2020 la funsiona ho normál, ne’ebé rezulta ekonomia rai laran hakdasak ba beibeik.
Aleinde ne’e, partidu CNRT iha espetativa, PR eleitu bele komprometidu atu halo reforma iha setór judisiáriu, nune’e bele garante no asegura aplikasaun lei no orden, liuliu bele garante justisa tuir Konstituisaun no lei sira haruka.
Ikus liu, husu PR eleitu komprometidu atu la halo Prezidénsia Republika sai fali opozisaun ba Governu, nune’e Governu tuir mai bele atinje Estadu tomak nia objetivu atu dada Kadoras Greater Sunrise mai Timor-Leste.
Biban ne’e, Premiadu Nobel da Paz ne’e agradese ba apoiu Partidu CNRT ne’ebé fó fiar ba nia hodi kandidata-an kompete iha Eleisaun.
“Ha’u agradese tebes ba Maun Boot, Kay Rala Xanana Gusmão no Partidu CNRT inklui movimentu tomak, ne’ebé fó apoiu ha’u atu kandidata-an ba Prezidente Repúblika. Iha kampaña mak ha’u sei hato’o deskursu kle’an,” dehan Horta.
Antes ne’e, hafoin restaurasaun independénsia, José Ramos Horta eleitu nu’udar Prezidente Repúblika daruak ba períodu 2007-2012 hosi Independente.
Jornalista : Hortencio Sanchez
Editora : Julia Chatarina
