iklan

HEADLINE, MUNISÍPIU, VIQUEQUE

Progresu konstrusaun UKL Viqueque atinje 70%

Progresu konstrusaun UKL Viqueque atinje 70%

UKL iha Viqueque. Imajen TATOLI/Vitorino Lopes da Costa

DILI, 20 janeiru 2022 (TATOLI)–Diretór Planu Nasionál Dezenvolvimentu Suku (PNDS) munisípiu Viqueque, Higinio Pozinato e Silva, informa, progresu konstrusaun Uma Kbiit Laek (UKL) hamutuk unidade 108 iha munisípiu Viqueque, janeiru ne’e atinji ona 70%.

“Konstrusaun Uma Kbiit Laek iha munisípiu Viqueque atu finaliza ona, maibé ita iha difikuldade ba distribuisaun materiál. Balun hotu ona no balun foin lalais ne’e paradu tanba kalen tuir padraun nasionál maka hotu maibé daudaun la’o fali ona,” Diretór PNDS munisípiu Viqueque hateten ba Agência TATOLI, via telefónika, kinta ne’e.

Notísia relevante: Progresu konstrusaun UKL 108 iha suku 36 Viqueque

Maski nune’e, iha ona data tentativa ba seremónia inaugurasaun UKL iha loron 27 janeiru 2022.

“Ita sei hein ekipa PNDS no suku Caraubalho nia preparasaun ba seremónia inaugurasaun,” nia akresenta.

Konstrusaun UKL iha munisípiu Viqueque, iha aldeia Fahi-luhan, suku Uma-tolu, postu administrativu Lacluta foin atinje 20%, tanba dalan liga ba suku kotu nune’e labele distribui materiál konstrusaun.

“Foin halo pondasi, agora ita aloka materiál hanesan semente, besi no bataku ba ladi’ak tanba  dalan kotu,  nune’e ami halo pedidu ba Institutu Jestaun Ekipamentu, Institutu Públiku (IGE, I.P-sigla portugés) atu hadi’a dalan maibé to’o agora sira seidauk mobiliza,” nia dehan.

Tuir Responsável programa ne’e, obstákulu ne’ebé agora ekipa hasoru iha terrenu maka klima tanba agora tempu udan, liuliu asesu dalan ba suku Nareka, Uaibobo no Liaruka iha postu Ossu.

Programa VIII Governu liuhosi Ministériu Administrasaun Estatál (MAE) ne’e aloka orsamentu hamutuk millaun $25 hodi konstrui UKL iha territóriu Timor-Leste unidade 1.272 iha tinan 2021, ne’ebé suku ida hetan uma tolu inklui munisípiu Viqueque ho suku 36 benefisia uma 108.

Jornalista  : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!