Diretór PNDS, Higinio Posinato Zamor e Silva. Imajen TATOLI/Vitorino Lopes da Costa

VIQUEQUE, 01 novembru 2021 (TATOLI)Diretór Programa Nasionál Dezenvolvimentu Suku (PNDS), Higinio Posinato Zamor e Silva, informa, progresu konstrusaun Uma Kbiit Laek (UKL) hamutuk 108 iha suku 36 Viqueque kontinua la’o, maski antes ne’e konsege paradu tanba mudansa klimátika difikulta movimentu.

“Progresu konstrusaun Uma Kbiit Laek iha munisípiu Viqueque ladún la’o tanba impaktu mudansa klimátika halo udan monu hela de’it, maibé agora hafoin udan para, iha fulan-outubru konstrusaun la’o hotu ona. Hosi Viqueque villa maka atinje ona 65%,” Diretór PNDS Viqueque informa ba Agência TATOLI, iha ninia knaar fatin, Viqueque villa, segunda ne’e.

Notísia relevante: Progresu konstrusaun UKL iha Viqueque atinje 52%

Tuir dadus UKL iha postu administrativu sira, postu Viqueque villa iha suku 10 benefisia UKL hamutuk 30, postu Ossu iha suku 10 benefisia UKL 30, postu Lacluta iha suku haat benefisia UKL 12, postu Uatulari iha suku neen benefisia UKL 18, suku Uatucarbau iha suku neen benefisia UKL 18, nune’e totál UKL iha Viqueque hamutuk 108.

Enkuantu, progresu UKL Iha postu Ossu to’o agora atinje 20%, Uatulari atinje 0,27%, Uatucarbau 41% no postu Lacluta atinje 29,17%.

“Hosi progresu UKL iha munisípiu Viqueque, ita haree progresu ne’ebé kiik liu maka postu Uatulari, foin maka atinji ba 0,27%, maibé agora ekipa PNDS nafatin akompaña ne’ebé konstrusaun la’o hela,” Diretór ne’e akresenta.

Maski nune’e, tuir Responsável programa PNDS iha Viqueque ne’e, iha novembru nia laran, uma balun iha rejiaun ne’e sei finaliza no sei prepara ba inaugurasaun.

“Atu marka loron ba inaugurasaun mak sei buka hela tempu di’ak ida,” nia tenik.

Antes ne’e, Governu lansa fatin dahuluk konstrusaun UKL 1.254 iha suku 424 iha juñu 2021, ho totál orsamentu millaun $25 no kustu ba kada uma entre $14.000 to’o $17.000.

Uma ne’ebé konstrui kompostu hosi tipu ka medida rua, tipu 48m2 ne’ebé inklui kuartu tolu, sala vizita ida no dapur, tipu 37 m2 ne’ebé sei inklui kuartu rua, kompletu ho sala vizita ho dapur.

Governu UKL konsidera nu’udar programa ne’ebé ninia orientasaun atu kria kondisaun komunidade kbiit laek sira iha nível aldeia, ne’ebé korresponde ho Planu Estratéjiku Dezenvolvimentu Nasionál (PEDN) 2011-2030, ne’ebé rekoñese povu Timor-Leste nia aspirasaun atu harii nasaun ne’ebé forte, prósperu no moris di’ak.

Jornalista : Vitorino Lopes da Costa
Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here