Médiku halo atendementu ba pasiente dengue sira iha Sentru Saúde Vera-Cruz, kinta, 6/1/2022. Imajen TATOLI/ Antonio Dasiparu

DILI,18 janeiru 2022 (TATOLI)—Diresaun Nasionál Saúde Públika liuhosi Departamentu Vizilánsia Epidemolojia iha Ministériu Saúde, relata, tersa ne’e, kazu dengue aumenta ba 521, hosi númeru ne’e nain-sia mak mate ona.

“Situasaun kazu dengue iha Timor-Leste, ohin, iha kazu dengue hamutuk 521 no kumulativu óbitu sa’e mós ba na’in-sia,” refere nota ne’ebé Agência TATOLI asesu tersa ne’e.

Kazu óbito iha semana dahuluk fulan janeiru 2022 iha ona óbitu na’in-ida ne’ebé relata hosi Munisípiu Dili, no iha semana datoluk relata tan kazu obitu na’in-haat hosi Ermera, na’in-ida hosi Ainaro no na’in-ida hosi Bobonaro no na’in-rua tan hosi Covalima. Nune’e, totál Case Fatality Rate nivél nasionál ho 1,7%.

Kazu detetadu pozitivu dengue ne’e, maioria hosi Dili ho totál 371, munisípiu Baucau 25 kazu, Manatuto ho kazu 23, Covalima ho kazu 19, Ermera ho kazu 46, Manufahi ho kazu 14, Viqueque kazu haat, Ainaro ho kazu haat, Liquiça kazu tolu, Aileu ida no Bobonaro kazu hitu.

Kazu dengue hosi Dili, hanesan postu administrativo Dom Alexo relata kazu totál 166, Cristo Rei ho kazu 73, Vera-Cruz ho totál kazu 65 no Na’in Feto ho totál kazu 64, ne’e hatudu katak kada loron kazu espalla nafatin ba iha postu administrativu sira seluk.

Too ohin loron fasilidade saúde iha munisípiu Dili hanesan HNGV rejista ona kazu dengue hamutuk 86, klinika Fatumeta 55, Sentru Saúde Comoro 66, Vera Kruz 43, Sentru Saúde Formoza 70, sentru saúde Becora 43, sentru saúde Metinaro haat, klinika Bairru-Pite rua, no klinika Motael na’in-ida.

Tanba ne’e, Diretór Nasionál Saúde Públika iha MS, Frederico Bosco Alves husu ba komunidade liuliu inan-aman sira bainhira labarik sira iha sintoma dengue lori lalais ba fasilidade saúde  ne’ebé mak  besik hodi hetan tratamentu hosi profisionál saúde sira

“Ita labele hein to’o moras ne’e tama iha faze krítiku mak foin ba tanba surtu dengue ne’ebé mak mosu ha’u hanoin la’ós dahuluk maibé ne’e kada tinan ita-nia nasaun sempre enfrenta moras dengue,” nia sujere.

MS ho ekipa saúde kontinua esforsu halo sensibilizasaun ba komunidade atu halo prevensaun liuhosi limpeza jerál tanba moras dengue fó ameasa ba ema nia moris.

“Entaun husi parte ami-nia haree daudaun ne’e la’ós foka ba iha  prevensaun de’it maibé  prepara ona fasilidade saúde atu responde   no saida mak ita halo mak sura mós ho partisipasaun komunidade sira nia ativu iha aspetu prevensaun  bainhira iha sinál ona lalais mai fasilidade saúde  atu bele  halo diagnosa sedu atu labele tama iha komplikasaun,” nia rekomenda.

Notísia Relevante: Pasiente dengue na’in-132 konsege rekuperadu

Jornalista : Felicidade Ximenes

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here