Primeiru-Ministru, Taur Matan Ruak, hasai foto ho Komadante Jerál PNTL, Komisáriu Polísia, Faustino da Costa no ofisiál superiór PNTL. Imajen Tatoli/Eugénio Pereira.

DILI, 20 janeiru 2022 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, hateten PNTL preparadu atu asegura seguransa iha eleisaun prezidensiál 2022.

Notísia Relevante: Tribunál Rekursu simu lista kandidatura PR to’o 04 fevereiru

“Preparasaun Komandu Polísia Nasionál Timor-Leste ninian ba iha prosesu kampaña to’o eleisaun prezidensiál, prontu asegura iha territóriu maske ami-nia rekursu sai mós kestaun ne’ebé presiza haree hodi jere didi’ak membru sira,” Komisáriu Faustino da Costa hateten ba jornalista sira hafoin ramata enkontru ho Prezidente Repúblika, Francisco Guterres ‘Lú Olo’, iha Palásiu Prezidensiál Nicolau Lobato, Bairru Pite, Dili, kinta ne’e.

Iha ekontru ne’e, Komandante Jerál ne’e mós relata preparasaun sira ligadu atu asegura seguransa iha prosesu hotu iha ámbitu kampaña eleitorál to’o iha datan eleisaun prezidesiál 2022 ne’e akontese.

Kona-ba kondisaun apoiu operasionál hanesan transporte, iha 2022 ne’e PNTL prevee ona orsamentu boot hodi sosa viatura no mós aluga mínimu karreta 32 hodi uza iha tempu kampaña to’o eleisaun no sosa ekipamentu nesesáriu ba pesoál sira utiliza.

“Situasaun ida ohin ami mós aprezenta ba Prezidente Repúblika identifika katak iha sentru votasaun balun dalaruma difísil loos asesu transporte, rede Komunikasaun no eletrifikasaun. Nune’e koordena ho parte relevante oinsá para bele asegura situasaun sira koloka iha kondisaun, nune’e atividade hotu bele la’o ho di’ak,” nia dehan.

Nune’e mós, Komandante Jerál PNTL ne’e aprezenta mós servisu PNTL iha tinan 2021 hodi atualiza kona-ba kazu balun ne’ebé PNTL atende no rejistu durante ne’e, liu-liu kazu asidente  trafegu ne’ebé rejista ema 59 mak lakon vida.

“Deteta katak kauza prinsipál ezijensia umanu katak ita ema laiha konsiénsia didi’ak bainhira  lori karreta no motor ho fatór la tau atensaun ba kondisaun viatura rezulta asidente sidadaun sira lakon vida,” nia dehan.

Durante enkontru, Prezidente Repúblika husu PNTL atu kontinua servisu ho profisionál tuir lei ne’ebé vigora no labele inklina ba grupu arte marsiál no partidu polítiku.

Kalendáriu eleitorál ba elesian Prezidente Repúblika

Kalendáriu eleitorál ba eleisaun Prezidente Repúblika, imprime iha 19 marsu to’o 02 maiu markasaun eleisaun no kalendáriu.

Dekretu Prezidente Repúblika markasaun loron eleisaun ba Prezidente Repúblika (14/01/2022) no publikasaun dekretu Prezidente Repúblika iha jornál repúblika iha 15/01/2022.

STAE públika kalendáriu operasaun eleitorál, 15-23 janeiru 2022.

Kandidatura no respetivu kontensiozu

Termu prazu ba aprezentasaun kandidatura ba iha Tribunál Rekursu hahú hosi loron 15 fulan-janeiru to’o loron 04 fulan-fevereiru tinan 2022.

Hafoin simu lista kandidadura, Supremu Tribunál Rekursu (STJ) verifika regularidade prosesu, autentikasaun ba dokumentu no elijibilidade kandidatu sira-nian.

Prazu ba iregularidade kazu Prezidente STJ notifika reprezentante kandidatu, no bainhira STJ verifika dokumentu kandidatu sira la kompletu mak sei notifika fila-fali prazu loron rua atu kompleta.

Desizaun Tribunál Rekursu kona-ba kandidatura iha 04-14 fevereiru 2022.

Interpozisaun rekusu ba koletivu Tribunál Rekursu kona-ba admisaun ka rejeisaun kandidatura, 15 janeiru 2022.

Desizaun ba rekursu komunika ba Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, siglá portugés) relasaun ba kandidatura sira defenitamentu admitida iha 17 fevereiru 2022.

Sekretariadu Tékniku Administrasaun Eleitorál (STAE) divulga ka publika kandidatura definitivamente admitidu iha komunikasaun sosiál iha loron 18 no 20 fevereiru 2022.

Konstituisaun sentru votasaun no estasaun votu

Sekretariadu Tékniku Administrasaun Eleitorál (STAE) divulga númeru no fatin sentru votasaun no estasaun votu iha 17 fevereiru 2022.

Kampaña Eleitorál

Periódu kampaña eleitorál akontese iha loron 02-16 marsu 2022.

Votasaun no apuramentu rezultadu

Loron eleisaun iha 19 marsu 2022 no hafoin prosesu votasaun termina inisíu kontajen votu iha sentru votasaun no envia urna ba apuramentu munisipál.

Apuramentu munisipál ba rezultadu no envi akta eleitorál no elementu (votu nulu, protestadu no reklamasaun ne’ebé existe) ba Komisaun Nasionál Eleisaun (CNE, siglá portugés) iha 19 to’o 21 marsu 2022.

Apuramentu finál rezultadu nasionál Komisaun Nasionál Eleisaun (CNE, siglá portugés) iha 22-24 abríl 2022.

Interpozisaun rekursu ba rezultadu nasionál provizóriu ba Tribunál Rekursu (TR) iha 28 abríl no Tribunál Rekursu (TR) deside rekursu iha 29 abríl 2022. Maibé iha loron 29 abríl CNE remete (haruka) akta rezultadu ba Tribunál Rekursu bainhira laiha rekursu.

Tribunál Rekursu (TR) analiza dokumentasaun envia hosi CNE, valida rezultadu no proklama rezultadu no fó sai númeru eleitór inskritu, votante, votu branku, nulu no votu atribui kada kandidatu iha 30 abríl no 05 maiu 2022.

Ikus liu publikasaun iha jornál repúblika ba akordaun Tribunál Rekursu nian.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here