Diretór Jerál Ensinu Sekundáriu MEJD, Luís Manuel da Costa Fernandes. Imajen TATOLI/Francisco Sony

DILI, 17 janeiru 2022 (TATOLI)–Ministériu Edukasaun Juventude no Desportu (MEJD) sei anunsia rezultadu korresaun pontu ezame nasionál iha fulan-janeiru nia laran.

Tuir Diretór Jerál Ensinu Sekundáriu MEJD, Luís Manuel da Costa Fernandes, prosesu anunsia rezultadu adia beibeik tanba daudaun Ministru Edukasaun Juventude no Desportu (MEJD), Armindo Maia, halo hela viajen akompaña Primeiru-Ministru, Taur atan Ruak, ba Oé-cusse no Ataúro.

“Ita hatene iha beibeik mudansa ba loron publikasaun, parese loron 20 janeiru Ministru fila mai maka foin anunsia rezultadu ba públiku, ne’ebé ita hotu hein de’it,” Diretór dehan ba Agência TATOLI, iha ninia knaar fatin, MEJD Villa verde, segunda ne’e.

Notísia relevante: MEJD adia oráriu finaliza korresaun pontu ezame nasionál

Tanba ne’e, prosesu matrikula foun ba estudante finalista sira hosi Ensinu Báziku 9o ano no Ensinu Sekundáriu Jerál no Tékniku Vokasionál 12o ano seidauk bele realiza tanba seidauk simu rezultadu finál hosi eskola ida-idak.

Antes ne’e, MEJD fó sai ona kalendáriu katak korresaun pontu ezame nasionál sei ramata iha loron 14 janeiru 2022 maibé la konsege tanba iha falla téknika balun.

Nune’e, adia fali ba loron 18 janeiru, maibé la konsege nafatin tanba Ministru laiha fatin ho nune’e adia tan.

Antes ne’e, ezame nasionál realiza iha loron 13 to’o 18 dezembru 2021, ne’ebé totál finalista Ensinu Báziku, Sekundáriu Jerál, Tékniku Vokasionál no Rekorente iha territóriu nasionál hamutuk 58.224.

Enkuantu, orsamentu ba impresaun matéria ezame nasionál tinan 2021 hamutuk $148.179.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here