Kondisaun Eskola Bázika Sentrál Suai Loro, postu administrativu Suai villa, munisípiu Covalima. Imajen TATOLI/Celestina Teles.

DILI, 19 janeiru 2022 (TATOLI)–Eskola Ensinu Báziku Pré-eskolár (EPE) to’o Ensinu Sekundáriu Jerál (ESJ) no Tékniku Vokasionál hamutuk 15 iha munisípiu Covalima tama ona planu konstrusaun hosi projetu komunitária ho totál kustu $1.612.455,32.

“Iha eskola 15 inklui sala 49 maka tinan ne’e sei hadi’a,” Diretór Servisu Edukasaun munisípiu Covalima, Rui Suri Seran, informa ba Agência TATOLI, via telefónika, kuarta ne’e.

Antes ne’e, iha loron 07 outubru 2021, Vise-Ministru Edukasaun Juventude no Desportu, António Guterres, asina kontratu ho grupu komunitáriu atu inisia projetu eskolár ne’e.

Notísia relevante: MEJD asina kontratu ho grupu komunitária konstrui eskola 15 iha Covalima

Eskola ne’ebé tama ona planu konstrusaun no reabilitasaun mak hanesan EPE rua iha sala aula haat ho kustu $215.252,46, Eskola Ensinu Báziku Filiál (EBF) 10 iha sala aula 30 ho kustu $958.187,61, no Eskola Ensinu Báziku Sentrál (EBC, sigla portugés) rua iha sala aula 12 ho kustu $335.111,03.

Kustu projetu ba eskola Ensinu Báziku hamutuk $1.293.298,64 no Eskola ESJ ida ho sala aula tolu ho kustu $103.904,22.

Eskola 15 ne’e mak hanesan EPE Bakun no Busa-kukun, Eskola EBF Laen tolu, Hól bolu, Mau kola, Has-ain, Ai-to’os, Tradu kama, Ma-kokon, Sa-Lasa, So-liga, Uke Kai, Eskola EBC mak hanesan Fatu mea no Zumalai, inklui Eskola ESJ Seran-Kote,

Enkuantu, konstrusaun eskola 15 ne’e rasik tama ona iha planu integradu ba konstrusaun eskola 203 ne’ebé MEJD planeia ona liuhosi Diresaun Nasionál Dezenvolvimentu Parque Eskolár.

Orsamentu ba projetu eskolár ne’e mai hosi Orsamentu Jerál Estadu 2021, ne’ebé ministériu aloka ba verba infraestrutura edukativa hamutuk millaun $25-resin no ba kategoria transferénsia públika $20.274.586,97 hodi hala’o projetu komunitária atu hadi’a eskola 203, iha kapitál dezenvolvimentu aloka millaun $4-resin.

“Planu konstrusaun ne’e iha ona dadus hosi munisípiu tolu inklui Covalima, enkuantu munisípiu Seluk seidauk hetan konfirmasaun,” Diretór akresenta.

 Jornalista : Tomé Amado

 Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here