Vise-MEJD asina kontratu no entrega Matadalan ba grupU komunitária iha MunisípiU Covalima. Imajen Tatoli/Celestina Teles.

COVALIMA, 07 outubru 2021 (TATOLI)—Vise-Ministru Edukasaun Juventude no Desportu, António Guterres Asina, kontratu ho grupu komunitária ne’ebè atu konstrui no reabilita eskola 15 iha munisípiu Covalima. 

“Orsamentu Jeral Estadu (OJE) tinan 2021, ita tau prioridade ba infraestrutura. Ita-nia planu aprova iha parlamentu nasional, ita prevee orsamentu infraestrutura hamutuk kuaze $38,000-resin,” António Guterres hateten ba jornalista sira hafoin asina kontratu ho grupu komunitária sira, iha edifisiu Edukasaun Munisípiu Covalima, kinta ne’e. 

Orsamentu konstrusaun no reabilita eskola iha munisípiu Covalima mai hosi OJE 2021 ne’ebè prevee iha transferénsia públika, grande projetu mai hosi rubrika fundu infraestrutura ni’an  no konstrui eskola Kafe haat. 

Nia husu ba grupu komunitária sira atu jere orsamentu tuir matadalan ne’ebè mak iha no labele jere orsamentu tuir ida-idak nia hakarak. 

“Semana oin, ita-boot sira bele loke ona konta bankaria iha BNCTL, nune’e belè hahu ona konstrusaun. Ha’u husu ba dirijente eskola sira atu jere orsamentu tuir matadalan. Ha’u lakohi rona inan-aman atu reklama,” nia dehan. 

Administradór Munisípiu Covalima, Francisco de Andrade, agradese ba Ministériu Edukasaun Juventude no Desportu tanba tinan ne’e MEJD konstrui no reabilita eskola 15 iha Covalima. 

“Orsamentu ba konstrui no reabilita ne’e mai hosi Governu. Molok ne’e, ekipa nasionál aprezenta ona lista mai ha’u no ita-boot sira mós forma ona grupu, ne’e di’ak,” nia dehan.

Administradór iha esperansa ba grupu sira-ne’ebè mesak Covalima-oan, bainhara konstrui no reabilita projetu ne’e tenke garante nia kualidade no tuir matadalan, tanba bazea ba esperiénsia ema balun aproveita osan la garante nia kualidade.

“Ami sei halo monitorizasaun bainhira iha difikuldade bele kontaktu ha’u. Ita hamutuk, ita luta nafatin ba dezenvolvimentu iha Covalima kontinua la’o ba oin,” nia hateten.

Orsamentu atu halo konstrusaun no rehabilitasaun eskola hamutuk 15 iha Munisípiu Covalima ho totál hamutuk millaun $1,6. 

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here