Prezidente Repúblika, Francisco Guterres "Lú Olo". Imajen Tatoli/Egas Cristovão

DILI, 30 dezembru 2021 (TATOLI)—Prezidente Repúblika, Francisco Guterres Lú Olo, promulga ona Dekretu-Lei ne’ebé kria subsídiu ba profisionál sira-nia atividade jornalístika ne’ebé husu hosi Governu ba fornesimentu notísia kona-ba virus SAR-Cov2 durante estadu emerjénsia.

“Profisionál komunikasaun sosiál iha papél importante tebes tanba liuhosi sira-nia atividade jornalistika durante estadu emerjénsia kontribui ativamente ba divulgasaun informasaun kredivel no nesesáriu ba prevensaun no kombate pandemia COVID-19 iha territóriu nasionál. Liuhosi atividade jornalístika profisionál komunikasaun sosiál fó informasaun ne’ebé loloos hodi nune’e hatun ansiedade no prevene pániku iha populasaun nia leet, no ikusmai kontribui hodi halo tuir regra estadu emerjénsia ninian,” refere komunikadu imprensa ne’ebé Agência Tatoli josi Palásiu Prezidnesiál Nicolau Lobato, Bairru Pite, Dili, kinta ne’e.

Desinformasaun ne’ebé mosu iha rede sosiál (facebook) atu halo ema la fiar autoridade relasiona vasinasaun no kombate ba moras ne’e, papél jornalista importante tebes halo populasaun informadu no fiar ba medida implementasaun estadu emerjénsia nian.

Papel jornalista nian ne’ebé identifikadu no husu espesifikamente hosi Governu, tanba ne’e bele hetan rekompensa. Subsídiu ne’e fó ba jornalista sira haree ba rekoñesimentu risku ne’ebé profisionál orgaun komunikasaun sosiá hasoru durante hala’o atividade jornalístika iha pandemia COVID-19 nia laran.

Subsídiu ne’e sei fó ba jornalista sira-ne’ebé dezenvolve atividade jornalístika ho Sala de Situasaun Sentru Integradu Jestaun Krize ka sira-ne’ebé Governu husu ba produsaun notísia durante períodu entre 1 abril-31 dezembru 2021.

Subsídiu ne’e sei sura hosi loron traballu efetivu durante data ne’ebé temi iha leten, tanba jornalista sira-ne’e sei simu osan ho valór $5 ba kada loron efetivu traballu nian.

Ministru Assuntu Parlamentares no Komunikasaun Sosial, ho baze informasaun fornese hosi Sala Situasaun Sentru Integradu Jestaun Krize ka hosi Dirasaun Nasionál ba Diseminasaun Informasaun Ministériu Asuntu Parlamentár no Komunikasaun Sosiál aprova lista profisionál ne’ebé dezenvolve atividade jornalístika.

Prifisionál hirak ne’e prenxe kondisaun hatuur iha artigu 1 hosi Dekretu-Lei ne’e, subsídiu ba profisionál hala’o atividade jornalístika, tuir Lei númeru 5/2014, 19 novembru, Lei Komunikasaun Sosiál, hamutuk ho Sala Situasaun Sentru Integradu Jestaun Krize ka sira-ne’ebé Governu husu ba produsaun notísia iha kondisaun direta ba espozisaun virus SARS-Cov2 durante implementasaun estadu emerjénsia deklara tutuir malu hosi dekretu Prezidente Repúblika.

“Dekretu-Lei ne’e aprova iha Konsellu Ministru iha 11 novembru 2021,” nota imprensa ne’e hateten.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here