Ministru Finansa, Rui Augostu Gomes. Imajen TATOLI/Francisco Sony

DILI, 18 janeiru 2022 (TATOLI)–Governu gasta ona orsamentu hamutuk $257.779.899 ba kustu operasionál, kompostu hosi mina no manutensaun veíkulu Estadu durante tinan-18 nia laran, hahú tinan 2002 to’o 2020.

“Ne’e hatudu kada tinan ita gasta millaun $14,3 ka fulan-ida ita gasta millaun $1,2 ka loron ida ita gasta $57.000 ba de’it mina no manutensaun veíkulu Estadu,” Ministru Finansa, Rui Augusto Gomes, relata, liuhosi diskursu iha seremónia, diseminasaun regra no prosedimentu jestaun no realokasaun veíkulu Estadu, iha Auditorium Ministériu Finansa, Aitarak-laran, tersa ne’e.

Tuir Ministru, montante ne’e konsidera a’as tebes ba nasaun ne’ebé sei enfrenta dezafiu estruturál hanesan kiak no má-nutrisaun.

“Timor-Leste nasaun ida ne’ebé ho nível má nutrisaun a’as liu iha mundu ho populasaun millaun 1,2, maibé ita-nia rikusoin iha fundu petrolíferu billaun $19-resin maibé ema sira moris ho má-nutrisaun pur volta 50%, ne’e moe ba ita-nia rain, ita ko’alia kona-ba oan sira katak ita sira fuk mutin ne’e sai sira mak atu subtitui maibé oinsá mak sira bele enfrenta dezafiu má nutrisaun, ida-ne’e dezafiu ida mai ita hotu,” nia akresenta.

Iha tinan kotuk, atu mellora jestaun veíkulu ne’ebé ho rigorosu, Governu aprova ona Rezolusaun Governu ho númeru 130/2021 kona-ba Jestaun no Realokasaun Veíkulu Estadu ne’ebé sei regula no kria kondisaun sira atubele reforsa jestaun ne’ebé efisiente no rigór liután, atu nune’e bele kontribui ba efisiénsia no rasionalizasaun gastu ba Karreta Estadu.

Aleinde ne’e, Governu mós opta polítika foun liuhosi aprovasaun Dekretu Lei númeru 21/2021 kona-ba subsídiu transporte, hodi transforma kustu operasionál karreta Estadu ba subsídiu transporte.

Notísia relevante: Governu kria subsídiu mensál transporte ba funsionáriu administrasaun públika

“Ida-ne’e nu’udar meiu ne’ebé atu hakbiit kapasidade funsionáriu públiku sira ba despeza transporte no atu hamenus kustu sosa karreta foun, kombustível no halo manutensaun”, nia esplika.

Dekretu Lei númeru 21/2021 kona-ba Subsídiu Mensál Transporte, ne’ebé hahú tama ein vigor iha fulan ida-ne’e, fó kompeténsia téknika ba Ministériu Finansa atu koordena, organiza, no implementa polítika Jestaun no Realokasaun Veíkulus Estadu no Subsídiu Mensál Transporte.

“Nia objetivu atubele redus despezaa Estadu ba uzu veíkulu Estadu. Iha ema nia moris, iha forma haat utiliza patrimóniu ka rikusoin, hanesan dahuluk patrimóniu ne’e ita-nia no ita uza ba Ita-nia interese ka nesesidade ne’e iuta kuidadu lós, daruak patrimóniu  ita nian, maibé uza ba ema seluk nia interese ka nesesidade, ota preokupa looos, datoluk patrimóniu ne’e ema-nia maibé ita uza ba ita-nia interese ne’ebé laiha nesesidade, ita gosta loos, no ikus liu patrimóniu ne’e ema hotu nian no ita uza ba interese ka nesesidade koletivu nian, ita la preokupa liu atu a’at ka lae,” Ministru dehan.

Polítika poupansa ba despeza ho veíkulu Estadu mosu tamba komportamentu sira, nune’e, presiza asaun imediata atu nune’e Governu bele konsentra alokasaun orsamentu ba nesesidade investimentu no kapitál ne’ebé Governu rasik konsidera nu’udar prioridade iha ninia governasaun.

Aleinde ne’e, despeza operasionál veíkulu halo orsamentu ba mákina Estadu hetok boot ba beibeik no dezvia despeza ne’ebé tuir loloos ba setór produtivu sira.

Fasilidade sira ne’ebé Governu disponbiliza ne’e, ein vez de rezulta ba kreximentu no melloramentu iha prestasaun servisu ba públiku, maibé hatodan fali kapasidade finanseira Estadu nian.

“Polítika ne’e forma ida atu introdús efisiénsia ba despeza no efisiénsia ba utilizasaun rekursu Estadu. Iha tinan ne’e, Ministériu Finansa sei kontinua identifika, diskuti no elabora tan dokumentu legál sira ne’ebé sei aplika ba Jestaun no Realokasaun Motorizada Estadu nian, inklui mós poupansa sira seluk,” Membru Ezekutivu ne’e subliña.

Iha sesaun traballu ne’e, ekipa Ministériu Finansa disemina informasaun sira kona-baa Regra no Prosedimentus hanesan Rezolusaun Governu númeru 130/2021 ba Jestaun no realokasaun veikulu Estadu, Despasu Ministériu Finansa kona-baa ‘impaktu númeru fiksa’, realokasaun no redusaun ba Leilaun, inklui ‘Padraun Prosedimentu Operasional’ ba realokasaun no utilizasaun veikulu iha liña ministeriál, instituisaun Estadu no SFA no Pool Nasionál.

Ba Jestaun Patrimóniu Estadu, Governu responsabilidade tau-matan atu utilizasaun, jestaun no kontrola ho di’ak atu labele fó prejuizu ba kofre Estadu.

Tamba ne’e, Komisaun Interministeriál ba Reforma Jestaun Finansa Públika no Sub Komisaun ba Reforma Jestaun Patrimóniu Estadu estabelese ona hodi asegura implementasaun polítika no jestaun inventarizasaun ne’ebé prudente liután, ne’ebé konsentra ba valorizasaun no depresiasaun patrimóniu.

“Ida-ne’e atu garantia akuntabilidade liuhosi relatóriu Konta Jerál Estadu ne’ebé Governu sei aprezenta ba Parlamentu Nasionál nu’udar orgaun fiskalizadór kada tinan,” Rui Gomes esklarese.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here