Prezidente Komisaun A PN, Joaquim dos Santos. Imajen Tatoli/Egas Cristóvão

DILI, 18 janeiru 2022 (TATOLI)—Komisaun A trata asuntu Justisa no Konstituisional iha Parlamentu Nasionál, tinan ne’e tau ona prioridade iha kalendáriu ba diskusaun proposta lei 10-resin, inklui alterasaun lei Pensaun Vitalísia ne’ebé durante ne’e Parlamentu Nasionál suspende hela.

Notísia Relevante: Kaleidoskópiu 2021: PN kontinua suspende proposta alterasaun lei pensaun vitalísia

“Iha lei-10 resin ne’ebé konsidera importante sei tama iha prioridade inklui alterasaun lei Rejime Remuneratóriu ba Orgaun Titulár ka alterasaun lei pensaun vitalísia ne’ebé durante ne’e PN suspende hela,” Prezidente Komisaun A, Deputadu Joaquim dos Santos, hateten ba Agéncia Tatoli, iha Parlamentu Nasionál.

Inisitiva lejislativa sira-ne’e mak hanesan Rejime jurídiku Asosiasaun Públika, Orden Advogadu, Estatutu Defensória Públika, Formasaun Judisiáriu, Estatutu Funsaun Públika ho sira seluk no mós sei haree projeitu lei balun ne’ebé inisia hosi Deputadu sira rasik, no proposta lei ne’ebé antes ne’e hetan veta hosi Prezidente Repúblika hanesan Majistradu Ministériu Públiku, Konsensan Indultu.

Prezidente Komisaun A ne’e hateten, alterasaun lei Rejime Renumeratóriu ba Órgaun Titulár ka alterasaun lei pensaun vitalísia ne’e atu finaliza diskusaun komisaun ba to’o iha plenária, ida-ne’e depende deputadu sira-nia konsensu bele aprova tanba halo lei ho vizaun no bazea ba prinsípiu polítiku no demokrátiku.

Enkuantu, Konsellu Ministru (KM) liuhosi reuniaun iha 19 fevereiru 2020, aprova ona proposta ba alterasaun dahuluk lei ba eis titulár sira, ne’ebé define kona-ba Pensaun Vitalísia.

Proposta ne’e prevee oinsá atu ajusta Rejime Pensaun Vitalísia ba Rejime Seguransa Sosiál, ne’ebé sei la elimina direitu ba ema ruma, liu-liu ba órgaun titulár sira, no diploma ne’e aprezenta hosi Ministru Reforma Lejizlativa no Asuntu Parlamentár, Fidelis Manuel Leite Magalhães.

Hafoin hetan aprovasaun iha KM, Governu lori proposta ne’e ba Parlamentu Nasionál (PN) atu bele diskute.

Iha 04 maiu 2021, Komisaun A ne’ebé trata asuntu Justisa no Konstitusionál suspende proposta-alterasaun ba lei estatutu remuneratóriu ba titulár kargu polítiku tanba sei hein Governu aprezenta regra aplikasaun.

Proposta alterasaun ne’e baibain ema bolu ” Lei Pensaun Vitalísia” maibé termu loloos ne’e mak “Estatutu Remuneratóriu ba Titulár Kargu Polítiku sira.

Remuneratóriu ba titulár kargu polítiku sira bazea ba regulamentu UNTAET númeru 2001/13, 6 dezembru.

No alterasaun Proposta Lei Pensaun Vitalísia aprovadu iha Parlamentu Nasionál iha janeiru 2017, ho votu a-favór 42, kontra 5 no abstensaun 5.

Proposta Lei ne’e konsege hamenus hosi pursentu 100 ba pursentu 60 husi vensimentu ba deputadu no eis titulár sira-ne’ebé ezerse kargu ho efetividade funsaun durante tinan lima tuir malu ka interpoladu.

Nune’e mós, hamenus hosi pursentu 100 ba pursentu 75 hosi vensimentu ba deputadu no eis-titulár sira-ne’ebé ezerse kargu ho efetividade funsaun durante tinan 10 tuir malu ka interpoladu, enkuantu hamenus pursentu 90 ba deputadu sira ezerse ona kargu durante tinan 15 tuir malu.

Pensaun sei mantein pursentu 100 ba Prezidente Repúblika, pursentu 90 ba Prezidente Parlamentu Nasionál, Primeiru-Ministru no Prezidente Tribunál Rekursu.

Pagamentu ba pensaun ne’e sei akontese bainhira deputadu no eis-titulár sira kompleta ona tinan 50 no ramata ona ninia mandatu.

Notísia Relevante: Aniceto Guterres: “Ha’u sei la budu alterasaun Lei Pensaun Vitalísia”

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here