Prezidente IQTL, I.P, Rosito de Sousa Monteiro. Imajen TATOLI/Francisco Sony

DILI, 17 janeiru 2021 (TATOLI)–Institutu Kualidade Timor-Leste, Institutu Públiku (IQTL, I.P sigla portugés) hamutuk ho Organizasaun Nasaun Unida ba Dezenvolvimentu Industriál (UNIDO, sigla inglés) iha ona planu tinan ne’e sei estabelese laboratóriu nasionál ba kualidade produtu.

Prezidente IQTL, I.P Rosito de Sousa Monteiro, hateten, tinan kotuk aloka ona osan millaun $1 hamutuk ho parseiru UNIDO atu estabelese laboratóriu nasionál.

“Nune’e, bele hahú estabelese infraestrutura kualidade ne’ebé garante labotóriu kualidade ai-han iha Timor-Leste. Daudaun ne’e ami hein parte UNIDO, atu iha fulan-fevereiru ka inísiu marsu nia-laran hahú levantamentu infraestrutura kualidade, identifika ka prodús uluk modelu laboratóriu ne’ebé sei implementa iha Timór no ninia implementasaun durante tinan-tolu, hahú 2022 to’o 2024,” Prezidente IQTL, I.P informa ba Agência TATOLI, iha ninia knaar fatin, segunda ne’e.

Notísia relevante: MTKI realiza semináriu diseminasaun fortalesimentu sistema infraestrutura kualidade iha Timor-Leste

Nia konsidera, laboratóriu nasionál ba kualidade produtu ne’e importante tanba la’ós atu halo analiza de’it ba produtu lokál ne’ebé atu esporta, maibé ba konsumu nasionál mós presiza halo teste.

“Hahán ne’e ba ema-nia saúde presiza halo analiza no tenke hatene ninia kualidade,” nia akresenta.

Maski durante ne’e seidauk iha laboratóriu nasionál, maibé tuir Rosito de Sousa seidauk iha  problema boot ruma no bainhira empreza ruma hakarak esporta sasán, sira diretamente ba halo teste produtu ba laboratóriu ne’ebé hetan ona sertifikasaun akreditasaun.

“Daudaun ita esforsu hela harii rasik ita-nia laboratóriu, nune’e bainhira empreza ruma hakarak haruka nia produtu ba rai-li’ur, bele halo teste no analiza iha laboratóriu nasionál no bele hetan reseita. Bainhira eziste ona, ami sei halo jestaun di’ak nune’e maluk sira bainhira haruka produtu ba rai-li’ur bele garante  produtu sira ne’e prienxe rekezitu no tuir padraun,” nia akresenta.

Nune’e, ba oin sei harii laboratóriu ho kualidade ba produtu, atu adapta tuir nasaun Austrália, Portugál, no Indonézia.

Kona-ba lei ba serfifikasaun produtu, Prezidente IQTL, I.P dehan, kestaun ne’e sai problema tanba presiza jurídiku ne’ebé bele prodús lejizlasaun ne’ebé mak bele garante atividade.

“Ami presiza jurista atu halo lei hodi bele garante ami-nia atividade ne’ebé liga ba kompeténsia IQTL, I.P iha dekretu-lei númeru 10/2018, ne’ebé mak alteradu ona dekretu númeru 15/2021 15 setembru,” nia tenik.

Tinan ne’e, Orsamentu Jerál Estadu 2022 prevee ona orsamentu atu prodús dekretu ne’ebé liga ba kompeténsia institutu iha área tolu hanesan meteorolójia, normalizasaun no re-kualifikasaun.

“Orsamentu ne’ebé prevee ba IQTL, I.P tinan ne’e milliaun $1,38, ne’ebé osan sira mak ita sei uza hodi halo rekretutamentu ba jurista atu halo lei,” nia akresenta.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here