Semináriu nasionál ho tema ‘desiminasaun fortalesimentu infrestrutura kualidade iha Timor-Leste, iha salaun Hotel Timor, sesta (15/10). Imajen TATOLI/Francisco Sony

DILI, 15 outubru 2021 (TATOLI)–Ministériu Turizmu Komérsiu no Indústria (MTKI, sigla portugés), liuhosi Institutu Kualidade Timor-Leste, Institutu Públiku (IQTL, I.P, sigla portugés), realiza semináriu ‘diseminasaun fortalesimentu sistema infraestrutura kualidade iha Timor-Leste’.

Vogál IQTL, I.P, Rosito Monteiro, hateten, inisiativa ne’e tanba Governu Timor-Leste no Organizasaun Nasaun Unida ba dezenvolvimentu Industriál (UNIDMO, sigla inglés) halo kooperasaun atu moderniza sistema infraestrutura kualidade ba instituisaun ne’ebé ninia knaar haree ba kulidade sasán hanesan Autoridade Inspensaun no Fiskalizasaun Atividade Ekonómika Sanitária no Alimentár (AIFAESA), Ministériu Agrikutór no Peska (MAP) inklui MTKI no IQTL.

Vogál IQTL, I.P, Rosito Monteiro. Imajen TATOLI/Francisco Sony

“Pontu importante, ko’alia kona-ba infraestrutura kualidade, ne’ebé durante ne’e hala’o maibé seidauk iha infraestrutura kualidade, entaun liuhosi kooperasaun ho UNIDMO, bele haforsa servisu instituisaun sira, haforsa kompetividade komérsiu no hafasil Timor-Leste ninia integrasaun iha kadeia valór rejionál no sistema komérsiu globál,” Vogál Rosito Monteiro, hateten, iha Hotel Timor, sesta ne’e.

Notísia relevante: Alterasaun Estatutu IQTL, I.P bele armoniza kategoria membru

Aleinde ne’e, IQTL ho kolaborasaun UNIDMO hahú estabelese infraestrutura ne’ebé di’ak atubele asegura Timor-Leste nia kualidade produtu bainhira halo exportasaun.

Haree ba IQTL ne’ebé tutela ba MTKI, hanesan institutu ne’ebé halo kontrolu ba produtu importasaun no produtu ne’ebé prodús iha rai-laran liuhosi análiza laboratóriu.

Aleinde ne’e, tuir dekretu-lei númeru 10 ne’ebé alteradu ho númeru 15/2021, institutu ne’e iha kompeténsia atu konsulta ho parte hotu atubele armoniza produtu sai estandar nasionál no prienxe rekezitu internasionál.

Fortalese infraestrutura kualidade ho laboratóriu

Tuir vogál OQTL, I.P, inisiativa atu fortalese infraestrutura kualidade iha Timor-Leste, mai ho hanoin atu harii laboratóriu nasionál atu kontrola kualidade sasán.

“Durante ne’e ita laiha laboratóriu, entaun ita-nia parseiru setór privadu sira sempre lori sira-nia amostra produtu ba rai-li’ur hodi halo teste hotu, rezultadu mai mak foin halo exporta sasán, entaun ita iha infraestrututra ne’ebé adekuadu, maibé atu reforsa halo teste ba produtu sira mak laiha,” Vogál konta tuir.

Nu’udar instituisaun atu kontrola kualidade sasán, IQTL sei koordena ho ministériu relevante sira atubele hahú kria laboratóriu rasik ne’ebé adekuadu atu produtu lokál sira ne’ebé mak Timor-Leste hahú exporta ba li’ur hanesan kafé, bele halo teste liuhosi laboratóriu akreditadu iha rai-laran, tanba seidauk iha laboratóriu própriu ba kontrola kualidade.

Notísia relevante: MTKI no ajénsia relevante diskute hadi’a kontrolu kualidade ai-han importasaun

Liu tan ne’e, IQTL ho UNIDMO sei kria sistema infraetrutura di’ak inklui fó formasaun ba timor-oan sira ne’ebé iha espesialidade iha labotáriu atu hahú halo formasaun iha rai-li’ur, nune’e bainhira fila-mai bele hahú halo servisu.

“Ohin hahú semináriu disemina informasaun ba ministériu relavante sira, ne’ebé fulan-ida ohin mai ita sei halo lansamentu ba kooperasaun entre Timor-Leste no UNIDMO, sei asina nota entendimentu atu hahú ona projetu sira ne’e no sei finansia hosi MTKI maibé implmenta hosi UNIDMO,” nia esklarese.

Semináriu ne’e partisipa hosi reprezentante AIFAESA, Ministériu Saúde (MS), Ministériu Koordenadór Asuntu Ekonómiku (MKAE), MAP, inklui setór privadu sira.

Iha fevereiru 2018, Governu liuhosi reuniaun Konsellu Ministru aprova kriasaun IQTL, I.P ho objetivu atu kontrola kualidade produtu importasaun no produtu ne’ebé prodús iha rai-laran.

Institutu ne’e mós sei fó sertifikasaun ba produtu ida no serbisu ho laboratóriu hodi garante produtu ida merese atu konsumu.

Jornalista : Arminda Fonseca

Editora    : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here