Dadus resensiamentu eleitorál munisípiu Viqueque. Imajen/STAE

DILI, 17 janeiru 2022 (TATOLI)–Diretór Sekretariadu Tékniku Administrasaun Eleitorál (STAE) Viqueque, Humberto Fernandes, informa, iha prosesu resensiamentu eleitorál rejista eleitór foun no tuan iha munisípiu Viqueque kuaze 5.000.

“Resensiamentu eleitorál  iha munisípiu Viqueque hosi jullu 2021 to’o taka iha loron 14 janeiru 2022, ami rejista eleitór foun no tuan hamutuk na’in-4.915. Nune’e, rekapitulasaun dadus eleitór hosi postu lima aloka hotu ona mai STAE Viqueque,” Diretór STAE informa ba Agência TATOLI via telefónika, segunda ne’e.

Notísia relevante: STAE Viqueque rejista eleitór foun iha postu lima hamutuk 1.890

Tuir  dadus rekapitulasaun postu Viqueque villa eleitór foun hamutuk na’in-176 no tuan hamutuk 138 nune’e totál eleitór hamutuk na’in-314, postu  Ossu eleitór foun ualu no eleitór tuan na’in-21 nune’e ho totál na’in-29, postu Uatulari  eleitór foun sia no eleitór tuan 24 nune’e ho totál 33.

Enkuantu, postu Uatucarbau eleitór foun 38 no eleitór tuan 25 nune’e ho totál 63, postu Lacluta eleitór foun 97 no eleitór tuan 25 nune’e ho totál 122.

Nune’e, rekapitulasaun dezembru 2021 to’o janeiru 2022, rejista eleitór foun feto 1.511 no mane 1450 ho totál eleitór 2.961, enkuantu eleitór tuan mane 1.124 no feto 830 ho totál eleitór tuan hamutuk 1.954.

Dirijente ne’e dehan, STAE halo ona preparasaun ba Eleisaun Prezidensiál, liuliu rekursu preparadu hotu ona.

“Rekursu STAE iha munisípiu Viqueque hamutuk na’in-1.213 ba preparasaun Eleisaun Prezidensiál ne’e, ita preparadu ona no daudaun hein lojístika no fó formasaun tan ba ita-nia rekursu umanu. Hosi númeru rekursu daudaun ne’e ita iha balun atu koloka ba postu no suku hotu,” nia akresenta.

Jornalista  : Vitorino Lopes da Costa

Editóra       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here