Diretór STAE munisípiu Viqueque, Humberto Fernandes. Imajen TATOLI/Vitorino Lopes da Costa

VIQUEQUE, 04 novembru 2021 (TATOLI)—Diretór Sekretariadu Tékniku Administrasaun Eleitorál (STAE) munisípiu Viqueque, Humberto Fernandes, informa, durante prosesu resensiamentu fulan-haat rejista eleitór foun hamutuk 1.890 iha postu lima.

“Relatóriu atividade resenseamentu eleitorá hosi fulan-outubru, ami konsege halo resensiamentu eleitorál foun hamutuk 455 iha munisípiu Viqueque. Enkuantu, rejistrasaun ba preparasaun eleisaun prezidensiál tinan 2022 iha postu lima, durante fulan-haat rejista totál eleitór foun hamutuk 1.890 no eleitór ne’ebé atualiza hamutuk 2.890,” Diretór STAE Viqueque, informa ba Agência TATOLI, iha ninia knaar fatin, kinta ne’e.

Notísia relevante: PR promulga alterasaun dahuluk Lei Resensiamentu Eleitorál

STAE Viqueque hahú halo resensiamentu hosi jullu, ne’eé hetan eleitór foun hamutuk 309 no atualiza hamutuk 282, setembru eleitór foun hamutuk 811 no atualiza 356, outubru eleitór foun 455 no atualiza 205.

Daudaun ne’e, resensiamentu eleitorál ne’ebé nafatin la’o iha postu tolu hanesan Viqueque Villa, Ossu no Uatulari tanba ekipamentu limitadu. Tanba ne’e seidauk instala atendimentu ba eleitór hosi postu Uatucarbau no Lacluta.

“Ami halo resensiamentu iha Eskola Sekundária Jerál iha postu Uatucarbau hodi halo prosesu rejistrasaun eleitór no agora daudaun ami iha planu atu ba Eskola Sekundária Santo António Lacluta, tanba ne’e sei halo koodenasaun hotu maka ami ba Lacluta,” nia tenik.

Desafiu ne’ebé ekipa STAE hasoru kuaze iha munisípiu hotu maka falta materiál hanesan leptop no mákina imprime (printer).

“Maski limitasaun ekipamentu, maibé orgaun eleitorál kontinua esforsu hodi fó atendimentu ba eleitór sira. Nune’e, prosesu resensiamentu nafatin iha postu tolu de’it,” nia dehan.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here