Diretór Jerál Estatístika-Ministéiru Finansa, Élias dos Santos Ferreira, asina akordu tékniku kooperasaun ho Diretór Jerál Koordenasaun Administrasaun no Finansas-MTKI, Cristiano Moura de Carvalho, iha salaun MTKI Bebora, segunda (17/01). Imajen TATOLI/Francisco Sony

DILI, 17 janeiru 2022 (TATOLI)–Ministériu Finansa (MF) liuhosi Diresaun Jerál Estatístika hamutuk ho Ministériu Turizmu Komérsiu no Indústria (MTKI) liuhosi Diresaun Nasionál Peskiza no Estatístika, selebra akordu kooperasaun serbisu tékniku iha área peskiza no estatístika.

Ministru Finansa, Rui Augusto Gomes, konsidera akordu entre instituisaun rua ne’e importante hodi serbisu hamutuk ba objetivu ida atu fornese dadus kredível ba públiku no uza dadus hirak ne’e hodi foti desizaun polítika no prepara planu ka programa ruma.

Ministru Finansas, Rui Augostu Gomes. Imajen TATOLI/Francisco Sony

“Parte rua diskute ona akordu ne’e hahú iha tinan kotuk no ohin bele realiza asinatura, nune’e parte Ministériu Finansa liuhosi Diresaun Jerál Estatístika sei fó apoiu tomak ba Ministériu Turizmu Komérsiu no Indústria, atu define no fó formasaun téknika iha asuntu rekolla no analiza dadus estatístika iha setór turizmu, komérsiu no industria,” Ministru hateten iha seremónia selebra akordu, iha salaun MTKI, Bebora, segunda ne’e.

Aleinde ne’e, bele dezenvolve mós programa Computer Assisted Personal Interviewing (CAPI) iha sistema operasaun Android, relasiona ho rekolla dadus iha terrenu, konverte dadus ne’ebé rekolla ona ba aplikasaun estatístika hodi analiza inklui fó formasaun ba funsionáriu tékniku MTKI kona-ba utiliza sistema.

Ministru dehan, dijitalizasaun importante, tanba Governu daudaun presiza dijitaliza métodu hala’o peskiza hodi asegura efetividade no kontrolu dadus ne’ebe rekolla.

Diretór Jerál Estatístika-Ministéiru Finansa, Élias dos Santos Ferreira, troka nota akordu tékniku kooperasaun ho Diretór Jerál Koordenasaun Administrasaun no Finansa MTKI, Cristiano Moura de Carvalho, iha salaun MTKI Bebora, segunda (17/01). Imajen TATOLI/Francisco Sony

“Ha’u orgullu tanba importánsia dijitalizasaun hetan rekoñesimentu hosi liña ministeriál no sosiedade sivíl, tanba ne’e Diresaun Jerál Estatístika iha akordu lubun ida ho instituisaun balun hodi apoia liuhosi formasaun, liga ho peskiza dijitalizadu. Ezemplu, ho Minsitériu Ensinu Superiór Siénsia no Kultura (MESSK), diresaun fó apoiu ba Fundu Dezenvolvimentu Kapitál Umanu (FDCH, sigla portugés) hodi inklui formasaun ba funsionáriu sira uza CAPI ka tablet durante hala’o entrevista ba bolseiru ne’ebé sai benefísiariu ba programa FDCH no formasaun ba funsionáriu Ministériu Planeamentu no Ordenamentu (MPO) kona-ba metodologia peskiza  inklui análiza estatístika,” nia akresenta.

Introdús mudansa desde tinan 2016

Enkuantu, hahú hosi 2016, Diresaun Jerál Estatístika introdús ona mudansa hosi peskiza tradisionál ka uza surat tahan ba modalidade eletrónika, ne’ebé aplika ona ba sensu agríkola iha tinan 2019, peskiza impaktu sósiu ekonómiku 2021, peskiza forsa traballu 2021, no peskiza no sondajen sira seluk.

Notísia relevante: Sensu agríkola 2019 iha kestaun haat Governu presiza tau prioridade

Tanba ne’e, Ministru espera ho kolaborasaun ne’e bele eleva tan kapasidade funsionáriu MTKI hodi rekolla, analiza no disemina dadus via online.

Diretór Jerál Estatístika-Ministéiru Finansa, Élias dos Santos Ferreira, troka nota akordu tékniku kooperasaun ho Diretór Jerál Koordenasaun Administrasaun no Finansa MTKI, Cristiano Moura de Carvalho, iha salaun MTKI Bebora, segunda (17/01). Imajen TATOLI/Francisco Sony

Aleinde ne’e, akordu tékniku ne’e serve mós hanesan enkuadramentu ida atu parte rua bele serbisu hamutuk besik malu liután iha área relevante hanesan formasaun jestaun análiza dadus estatístika sira.

Serbisu hamutuk ne’e inklui partisipasaun ekipa MTKI ba sondajen Índise Presu Konsumidór (IPK) analiza no disemina dadus, ne’ebé partisipasaun ekipa MTKI iha sondajen IPK nu’udar oportunidade di’ak tanba utiliza ona smartphone hodi rekolla dadus, ne’ebé bele fasilita transfere dadus rekollidu lais no reál hosi terrenu no assegura kredibilidade dadus.

“Ohin loron informasaun importante tebes hodi sai baze ba individuu ka instituisaun sira hodi prepara planu di’ak, ne’ebé tenke bazeia ba evidénsia ka evidence-based. Nune’e mós, atu halo dezenvolvimentu iha área xavi hanesan turizmu, agrikultura, komérsiu, no indústria nesesáriu tebes atu utiliza informasaun ne’ebé mai hosi metodolojia rigorozu no kredível,” governante dehan.

Tuir Ministru, dadus ne’ebé rekolla ona presiza halo tratamentu kedas atu disemina ba públiku inklui liña ministeriu, parseiru dezenvolvimentu, sosiedade sivíl, no akadémiku sira hodi sira bele halo iha koñesimentu kona-ba situasaun atuál no mudansa ne’ebé akontese liuhosi asaun governativa.

Nune’e, Ministru apela atu inisiativa sira bele mós akontese ho instituisaun sira seluk hodi hametin relasaun institusionál no eleva kualidade informasaun ba públiku.

Mellora serbisu diresaun

Diretora Nasionál Peskiza no Estatístika MTKI, Maria Amelia Sarmento. Imajen TATOLI/Francisco Sony

Iha biban hanesan, Diretora Nasionál Peskiza no Estatístika MTKI, Maria Amelia Sarmento, hateten, akordu ne’e realiza ho objetivu atu mellora serbisu diresaun liuhosi formasaun téknika iha área peskiza no analiza dadus estatístika ba setór turizmu, komérsiu no industria ne’ebé mak sai hanesan savi ba dezenvolvimentu ekonómiku Timor-Leste liuhosi kontribuisaun ba kreximentu ekonómiku hodi bele hamenus probreza.

“Atu hamosu planu, desizaun polítika no intervensaun liga ba dezenvolvimentu nasionál téknika bazeia ba evidénsia ka dadus informasaun atuál sira, Diresaun Jerál Estatístika ne’ebé hamahon-an iha Diresaun Jerál Koordenasaun Administrativa Finansa no Planeamentu Ministériu Turizmu, Komérsiu no Indústria tuir lei orgánika númeru 66/2020 define nia responsabilidade no kompeténsia maka atu promove, koordena, dezeña peskiza, no analiza dadus estatístika, liuhosi estudu kazu sira ne’ebé relasiona ho serbisu turizmu, komérsiu no indústria, ikus mai difine no jere sistema informasaun ida integradu hodi responde ba pedidu hosi internál ministériu no esternál,” Diretora dehan.

Ho kompeténsia ne’e maka Diresaun Nasionál Peskiza no Estatístika, ho responsabilidade no inisiativa halo aprosimasaun no konsultasaun téknika ho instituisaun relevante sira, ne’ebé rezultadu hosi liña koordenasaun ne’e konsege hamosu ona akordu tékniku ida entre MTKI no TIC-TL iha agostu 2021, ne’ebé fornese ona formasaun téknika sistema KoboToolBox ba funsionáriu tékniku MTKI no mós ba funsionáriu destakadu iha munisípiu Ainaro, Baucau, Bobonaro, Covalima, Liquiçá no Manufahi hamutuk na’in-85, ne’ebé iha ona koñesimentu kona-ba oinsá kolleta dadus ho dijitalizasaun.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here