Prezidente Autoridade Nasionál Petróleu no Minerál (ANPM), Florentino Mateus Soares Ferreira. Imajen TATOLI/Francisco Sony

DILI, 18 janeiru 2022 (TATOLI)—Daudaun ne’e, Autoridade Nasionál Petróleu no Minerál (ANPM) hanesan autoridade reguladór dezignada hosi Timor-Leste no Austrália, halo hela diskusaun ho parseiru sira hodi finaliza dokumentu enkuadramentu legál no fiskál atu dezenvolve kampu Greater Sunrise.

“Ita agora hatuur enkuadramentu legál no fiskál, liuliu aspeitu tributária inklui rejime reguladór. Ami-nia diskusaun hahú hosi jestór anteriór sira-nia serbisu ne’ebé mak iha, ein prinsípiu ANPM mak lidera prosesu diskusaun, ne’ebé tinan ne’e ami-nia alvu mak atu kompleta dokumentu sira hanesan petroleum mining code, kontratu partilla produsaun no enkuadramentu fiskál,” Prezidente ANPM, Florentino Soares Ferreira, informa foin lalais ne’e ba Agência TATOLI, iha ninia knaar fatin, edifísiu Ministériu Finansa, Aitarak-laran.

Enkuadramentu fiskál atu haree ba impostu no tributária no presiza kompleta mós rejime reguladór no kompeténsia jurizdisionál ne’ebé sei envolve entidade relevante sira hanesan aduaneira, imigrasaun no kuarentena.

“Iha pasadu ami halo arranjamentu trazisionál ba kampu sira ne’ebé ita muda ba jurizdisaun Timor-Leste ein kolaborasaun di’ak ho parseiru. Purtantu serbisu hirak ne’e la’o ona no ami atinje ona esbosu finál, ne’ebé daudaun iha faze idaidak halo revizaun no ninia pareser atu tuur no defende idaidak ninia interese, tanba diskusaun ne’e hosi parte tolu, Governu Timor-Leste, Governu Austrália no Greater Sunrise Joint Venture ne’ebé kompostu hosi Woodside, Timor Gás no Petróleu, Empreza Públika (Timor GAP, E.P) no Osaka,” nia akresenta.

Nune’e, fulan-janeiru nia laran sei halo kalendáriu atividade ba tinan 2022 no sei hahú filafali reuniaun ne’ebé antes ne’e ladún efetivu tanba situasaun COVID-19 dalabarak ho de’it virtuál.

“Ita fiar bainhira enkuadramentu sira iha mak foin halo planu dezenvolvimentu. Públiku dalaruma kahur sasán liu dehan asina tratadu, kadoras bele mai ona maibé opsaun dezenvolvimentu iha rua. Timor GAP, E.P hosi parte konsórsiu sei diskute ba Woodside sira hodi deside, planu dezenvolvimentu nia modelu oinsá, hatama opsaun ba ANPM no bainhira ami konkorda, sei lori ba Governu ne’ebé iha komisáriu tolu, rua hosi Timor-Leste no komisáriu ihosi Austália,” nia tenik.

Rejime espesiál

Estadu Timor-Leste liuhosi Timor GAP, E.P hola parte iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.

“Ema dalaruma hanoin katak kampu ne’e Timor-Leste ninian, maibé bainhira haree mapa, liña fronteira iha okos no rejime Greater Sunrise tuur iha leten. Agora liña okos hanesan provizionál, signifika nia iha maibé daudaun liña Greater Sunrise mak ita konsidera. Entaun bainhira rekursu ne’e ita dezenvolve, estrai no prodús, kampu ne’e la eziste maibé liña ne’e iha, signifika agora iha kampu iha liña provizionál ne’ebé nasaun rua mak hanesan na’in,” Prezidente ANPM esplika.

Tuir tratadu fronteira marítima iha anexu B, artigu 2, hatuur kona-ba Greater Sunrise nia estatutu ne’ebé partilla persentajen, katak bainhira dada kadoras bá Austrália mak Timor-Leste hetan 80% no Austrália 20%, enkuantu dada mai Timor-Leste hetan 70% no Austrália hetan 30%.

“Agora Greater Sunrise hanesan rejime espesiál, ne’ebé ANPM hanesan autoridade dezignada bainhira konkorda dada mai Timor-Leste, lei no enkuadramentu fiskál hatuur ona no buat hotu loos ona, ita hein dezenvolve deit. Karik tinan ne’e hatuur, tinan oin parseiru sira hato’o planu dezenvolvimentu mai, nune’e ANPM hato’o ba komisáriu na’in-tolu atu foti desizaun, se desizaun tun ona ita bele implementa no ezekuta ona konstrusaun iha tasi laran, hatún kadoras, no planta liquefied natural gas (LNG) iha Beaço,” nia tenik.

Aleinde ne’e, tanba Greater Sunrise tama iha rejime espesiál, país rua tenke hapar enkuadramentu legál no fiskál.

“Ita-nia lei la hanesan ho Austrália, ita adapta lei portugés ne’ebé maioria lei sivil. Entaun bainhira país rua atu regula rejime espesiál, kuandu ita tau ita-nia lei bele kontradiz ho sira no sira tau sira-nia bele kontradiz ho ita nia, entaun ita tenke buka dalan klaran. Ita haree parte ne’ebé han malu ita konkorda no halo provizaun hamutuk,” Prezidente ANPM dehan.

Notísia relevante: 2022: Timor-Leste asina kontratu fahe produsaun ba dezenvolvimentu greater sunrise

Nune’e mós, ba rejime fiskál tanba sistema impostu Timor-Leste la hanesan Austrália, maka presiza iha desizaun hamutuk atu sistema tributária ne’e justa ba país rua.

Enkuantu, kona-ba partilla produsaun, uluk kontratu haat, maibé agora presiza halo sai ida de’it ba rejime espesiál.

“Kontratu ne’e diskute no finaliza ona, maski iha parte balun mak iha diferensa ideia, liuliu asuntu desmantela no kontíudu lokál ne’e presiza diskute. Iha Austrália uluk desmantelamentu laiha, tanba sira-nia sistema konsesaun ne’ebé sira fó de’it ba empreza mak halo hotu no selu taxa, maibé Timor-Leste nia fahe lukru no pro-ativa envolve-an iha laran,” Florentino Soares tenik.

Tanba ne’e, país rua diskute hela kontratu partilla produsaun, atubele defende interese idaidak, nune’e bainhira hatama ba modelu ekonómiku, projetu ne’e viável ekonomikamente ba país rua.

“Ita halo ezersísiu atu hamosu kontratu partilla produsaun ida. Bainhira ita aseita ona termu kondisaun no provizaun iha laran mak ita bele asina no implementa, etapa tuir mai mak tama iha planu dezenvolvimentu, sira hatama dokumentu, ita hatutan ba komisáriu sira no komisáriu foti desizaun atu implementa Greater Sunrise Joint Venture, hahú halo konstrusaun ba plataforma, dada kadoras no konstroe planta LNG,” nia esklarese.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here