Ministru Petróleu no Minerál, Víctor da Conceição Soares. Imajen Tatoli/Egas Cristovão.

DILI, 03 dezembru 2021 (TATOLI)—Ministru Petróliu no Minerál (MPM), Victor da Conceição Soares, hateten iha tinan oin fulan ikus nian Timor-Leste bele asina ona kontratu fahe produsaun (Production Sharing Contract=PSC) nune’e bele hanoin ona dezenvolvimentu ba greater sunrise.

Notísia Relevante: Komisaun C rekomenda pontu importante 16 ba Governu no sia ba PN 

Ministru ne’e hateten, atualizasaun ba progressu diskusaun rejime espesiál greater sunrise nian refere ba tratatu fronteira máritima konforme anexu B kona-ba rejime espesiál kampu greater sunrise, Timor-Leste ho Austrália hahú negosiasaun sunrise depois tratadu ratifika no troka nota diplomátika ne’ebé akontese iha 30 agostu 2019.

Enkontru entre nasaun rua ne’e inisia iha loron 19 no 20 novembru 2019 hodi diskute asuntu importante balun ligadu ho enkuadramentu legál hanesan kódiku mineriu petróleu, kontratu fahe produsaun (PSC), rejime tributáriu fiskál no kompeténsia jurisdisionál.

“Dokumentu sira-ne’e desde hahú ita-nia negosiasaun ne’ebé tékniku sira halo iha ona progresu sira-ne’ebé di’ak tama ona segundu faze Timor-Leste hosi ANPM halo projetu ka proposta ba Governu Austrália no Austrália responde diskute mós ho konsorsiu (joint venture) sira, nune’e agora tama ona iha segundu ronde,” Ministru hateten hosi responde ba reprezentante povu iha debate proposta OJE 2022 faze jeneralidade ba loron datoluk, iha plenária Parlamentu Nasionál, sesta ne’e.

Ministru rasik no tékniku sira halo enkontru primeira vez ho ómologu Austrálianu ne’ebé atu ko’alia kona-ba oinsá reforsa inisiativa sira. Dokumentu tékniku sira, polítikamente parte sira konkorda atu bele reforsa aselera prosesu hirak ne’ebé la’o hela, no iha semana kotuk atu reforsa inisiativa sira-ne’ebé tékniku sira halo sorumutu ba polítika interese Estadu nian.

Nune’e mós, iha loron rua liu-ba Ministéru Petróliu no Minerál ho tékniku sira halo reuniaun ho konsórsiu greater sunrise atu halo aliñamentu ba prosesu tomak greater sunrise nian ne’ebé ho ómologu Austrálianu.

“Ita-nia Estadu propoin atu se bele buat hotu la’o di’ak ate fin do proximo ano, ita bele asina ona PSC nune’e bele hanoin ona dezenvolvimentu ba greater sunrise,’’ nia hateten.

Governante ne’e hateten, iha buat barak ne’ebé Timor-Leste presiza fó atensaun mak relativamente interrese Estadu Timor-Leste nian ho konteúdu lokál ne’ebé iha ona esperiénsia ba kotuk katak iha JPDA momentu ne’eba Estadu laiha rekursu, nune’e buat hotu Austrália mak halo no TL halo tuir buat hotu ne’ebé Austrália propoin.

Maibé kuaze tinan 20 Estadu TL forma ona timor-oan ne’ebé formadu iha área espesializadu setór ne’e, no daudaun sira insiste hodi kurije situasaun sira uluk ba buat ne’ebé iha territóriu nasionál, benefísiu másimu ba sosiedade liu-liu kresimentu ekonómiku nune’e diskusaun PSC dura tebes.

“Tanba ne’e, presiza kondisaun akomoda setór petróliu ninia nesesidade hotu,” nia dehan.

Iha biban ne’e, Ministru MPM, Vitór da Conceção Soares, relata kona-ba klarifikasaun rezultadu depresiasaun aset kampu greater sunrise nian, ne’ebé MPN no Timor GAP hala’o.

“Hakarak hato’o kona-ba rezultadu estudu ba tinan fiskál 2020 ne’ebé Timor Gap finaliza ona klarifakasaun mak hanesan refere akordu empréstimu entre BCTL ho Timor Gap ne’ebé aprovadu iha 2019. Timor Gap hetan impréstimu hosi BCTL ho montante millaun $650 no funan 4,5% anuál kampaun bazea ba akordu ne’e, Timor Gap rekere atu halo estudu avaliasaun ba asset valution tinan-tinan hodi evalua valór kampu greater sunrise,’’ nia dehan.

Ho nune’e, ba tinan fiskál 2020 Timor Gap finaliza ona estudu mensiona tuir padraun indústria petrolíferu liu ne’ebé adota globál.

“Rezultadu hosi asset evalution study tinan fiskál 2020, Greater sunrise ne’ebé finaliza ona hosi Timor Gap hatudu valór prezente líkidu mak zero (0),” nia informa.

Nia esplika, fatór importante ne’ebé mak fó impaktu direta ba valór hosi kampu greater sunrise 2020 mak hanesan inserteza hosi enkuadramentu fiskál, enkudramentu legál ba rejime espesiál greater sunrise no inserteza ba konseitu ne’ebé tenke hetan aliñamentu hosi sunrise joint venture wood side, Timor Gap, Osaga Gas, no hetan aprovasaun hosi Governu TL ho Austrália, nune’e mós presu globál.

Hosi fulan jullu 2020 to’o agora, Timor Gap esforsu servisu makaas hodi halo negosiasaun ho parsieru sunrise no joint venture no konsege iha ona aliñamentu entre nivél ba ezbosu enkuadramentu legál no fiskál no kontratu PSI.

Timor Gap kontinua halo negosiasaun nesesáriu ho parseiru joint venture sira bele fó serteza ba inserteza hotu ne’ebé mensiona pontu anterior, hodi bele hasa’e fila-fali valór hosi kampu greater sunrise sai pozitivu no iha futuru kampu greater sunrise atu fó benefísiu másimu.

Tempu badak mós Timor GAP sei marka audiénsia ho BCTL no gabinete jestaun fundu petroliféru, Ministéiru Finansa atu diskute kona-ba rezultadu estudu avaliasaun refere.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here