Pasiente moras dengue ne'ebé hala'o tratamentu saúde iha sentru saúde Vera-Cruz, imajen TATOLI/ Antonio Dasiparu

DILI,14 janeiru 2022 (TATOLI)—Diresaun Nasionál Saúde Públika liuhosi Departamentu Visilánsia Epidemolójia iha Ministériu Saúde (MS), sesta ne’e, relata iha meadu fulan-janeiru ne’e pasiente dengue sa’e ba 421, hosi númeru ne’e mate na’in-lima.

“Situasaun kazu Dengue iha Timor Leste, ohin, loron 14 janeiru 2022, kazu dengue hamutuk 421 no kumulativu óbitu na’in-lima,” refere nota ne’ebé Agência TATOLI asesu, sesta ne’e.

Notísia relevante: MS relata pasiente dengue aumenta ba 344

Hosi totál pasiente 421, maioria deteta hosi munisípiu Dili ho totál kazu 302, Baucau iha kazu 25 Manatuto 23, Covalima 17, Ermera 25, Manufahi 14, Viqueque na’in- haat, Ainaro tolu, Liquiça tolu, Aileu  ida no Bobonaro haat. Enkuantu iha posibilidade kazu sei aumenta iha semana hirak tuir mai no iha fulan oin-mai.

Munisípiu Dili nafatin rejistu kazu ne’ebe a’as iha semana dahuluk no semana datoluk iha fulan-janeiru 2022, ho totál kazu 302.

Kazu hirak ne’e, iha postu administrativu Dom Aleixo identfika kazu a’as liuhosi postu administrativu hotu ho totál 113, Cristo-Rei kazu 62, Vera-Cruz kazu 55 no Nain Feto iha kazu 51.

To’o ohin loron fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 72, klínika fatumeta 46, sentru saúde Comoro 46, sentru saúde Vera-Cruz 42, sentru saúde  Formoza 51, sentru saúde Becora 39,  sentru saúde Metinaro na’in-haat no  klínika Bairru-Pité na’in-ida.

Kazu óbito kauza dengue iha tinan 2020 ho totál 10 no iha tinan 2021 ho totál 11. Iha semana dahuluk fulan ne’e iha ona óbitu na’in ida, ne’ebé relata hosi Munisípiu Dili, no iha semada datoluk iha óbitu na’in-haat, hosi munisípiu Ermera.

Apela ba komunidade

Ministériu Saúde kontinua apela populasaun iha Dili laran no mós iha Munisipiu sira seluk, atu aprezenta-an iha fasilidade saúde ka Sentru Saúde ka Ospitál ne’ebé besik, bainhira sente isin-manas ka sente laran sa’e, liman-ain no sikun moras hodi bele hetan atendimentu husi profisionál saúde sira.

MS mós husu ba autoridade munisipál sira no autoridade lokál atubele orienta komunidade halo limpeza jerál iha suku no bairru-sira liuliu fase tanke, bidon ka balde tau bee semana ida dala ida.

Hamoos sasán ka limpeza hanesan roda aat, bazu ai-funan atu susuk labele tau tolun, haloot ropa ho diak iha uma laran, uza ropa ne’ebé liman naruk karik toba iha tempu loron, uza aimoruk hanesan repelente ka autan, uza muskitéru karik toba iha tempu loron no so’e lixu iha nia fatin.

Notísia Relevante: Fevereiru, Empreza hahú importa aimoruk kímiku fomigasaun no abate

Jornalista : Felicidade Ximenes

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here