Médiku halo atendementu ba pasiente dengue sira iha Sentru Saúde Vera-Cruz, kinta, 6/1/2022. Imajen TATOLI/ Antonio Dasiparu

DILI,06 janeiru 2022 (TATOLI)— Servisu Autónomu Medikamentu no Saúde (SAMES) kontrata ona kompañia South Austral. PTY LTD, hosi Austrália halo akizasaun ba aimoruk kímiku fomigasaun no abate atu rega susuk.

“Ita kontrata ona empreza South Austral.PTY LTD, no halo ona akizasaun ba produtu ka aimoruk kímiku abate no  fomigasaun. Ne’ebé espera inísiu fevereiru ne’e, importa no  to’o ona iha ita-nia rain, atubele distribui ba ita-nia fasilidade saúde sira,’’ Diretór Aprovizionamentu SAMES, Francisco Borges, hateten ba Agência TATOLI, iha nia knaar fatin-Kampo Alór, kinta ne’e.

Notísia Relevante: MS laiha estoke aimoruk kímiku rega susuk

Ministériu Saúde liuhosi SAMES halo kontratatu ho kompañia Australianu atu sosa aimoruk fomigasaun no abate ho orsamentu $51.000.

“Ita kontrata kompañia hahú iha tinan 2021, nune’e ita realiza pagamentu hotu ona, daudaun ita hein de’it simu sasan ka aimoruk sira ne’e,’’ nia afirma.

Hosi kontratu ne’ebé iha empreza sosa ona produtu ka aimoruk abate ho kuatidade saku hamutuk 75, ne’ebé kada saku iha kilograma 25 no aimoruk fomigasaun ho forma líkidu litru 1.400, ne’ebé kada bidón iha litru 200.

Daudaun, SAMES laiha estoke aimoruk kímiku hanesan fomigasaun no abate iha armazein atu halo distribuisaun ba sentru saúde sira hodi rega susuk.

“Ho kazu dengue ne’ebé daudaun aumenta iha ita nia rain, mak, horisehik ami-nia ekipa aprovizionamentu komunika ona ho kompaña atubele halo deliberasaun ho lalais. No ami husu atu produtu ne’ebé mak kuantidade oituan bele importa mai ona atubele responde ba kazu dengue,” nia informa.

Tuir dadus estátistika hahú hosi fulan janeiru to’o dezembru 2021, Servisu Saúde Munisípiu Dili (SSMD), rejista ema ne’ebé afetadu moras dengue hamutuk 672, hosi númeru ne’e, na’in-ualu mak mate.

Alende ne’e, HNGV rejista pasiente ne’ebé daudaun baixa hamutuk 750, hosi númeru ne’e maioria pasiente ho pozitivu dengue.

Notísia Relevante: 2021, SSMD rejista pasiente dengue 672 no óbitu na’in-ualu

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here