Universidade Nasionál Timor-Lorosa’e (UNTL). Imajen TATOLI/Francisco Sony

DILI, 19 novembru 2021 (TATOLI)–Inspetór Jerál Ministériu Ensinu Superiór Siénsia no Kultura (MEJD), Higino Alves, hateten, daudaun ne’e parte ministériu hein hela relatóriu finál hosi Universidade Nasionál Timor-Lorosa’e (UNTL) kona-ba ezekusaun pagamentu inzensaun propina ba estudante sira.

“UNTL seidauk submete relatóriu, razaun tanba empreza ne’ebé sira halo kontratu atu halo jilid ba dadus estudante ho volume 23.500 ne’e boot no labele serbisu ho di’ak, entaun sira kansela kontratu ho empreza hodi kontrata fali empreza seluk atu jilid. Tanba ne’e sira promete sei submete dadus estudante ba ministériu iha tempu badak,” Inspetór Jerál hateten ba Agência TATOLI, iha ninia knaar fatin, Colmera, sesta ne’e.

Tuir Higino, orsamentu hosi Fundu COVID-19 ho totál $5.618.312,50 ne’ebé Ministériu Finansa (MF) halo transferénsia ba Instituisaun Ensinu Superiór públiku no privadu hamutuk 18, bazeia ba lista ne’ebé simu.

“Maibé to’o finalidade ezekusaun, ministériu foin mak simu de’it relatóriu hosi universidade 17. Enkuantu Universidade Nasionál Timor Lorosa’e ne’ebé nu’udar instituisaun públiku ka Estadu nian mak to’o agora seidauk hatama relatóriu,” nia akresenta.

Notísia relevante: Estudante 34.307 hosi universidade 16 simu inzensaun propina faze daruak

Iha sorin seluk, Vise-Reitór UNTL, Samuel Venâncio de Sousa Freitas, hateten, razaun submete relatóriu tarde tanba presiza aprezenta dokumentu lubuk ida, tanba ne’e presiza halo preparasaun ida di’ak.

“Dadus ezekusaun dahuluk ha’u mós asina ona no foin mak haruka dadus ho númeru estudante 3.800 ba ministériu, seluk ita seidauk konklui, tanba ne’e seidauk haruka ba. Maibé ita sempre informa ba Inspetór Jerál ministériu kona-ba dadus estudante sira,” nia esklarese.

Relatóriu inzensaun propina faze dahuluk

Hosi rezumu badak monitorizasaun no fiskalizasaun ba inzesaun propina semestre impar ba instituisaun ensinu superiór 17, ne’ebé submete ona relatóriu ba MESSK, konsege rejista totál estudante 6.4466 simu reembolsa ba inzensaun propina ho totál $5.618.312,50, maibé hafoin ezekusaun seidauk atinje 100%.

Instituto Filosófico S. Francisco de Sales (IFFS) iha totál estudante 115 hetan transferénsia osan $17.250, maibé estudante 108 de’it mak hetan pagamentu ho montante $16.200, enkuantu estudante na’in-hitu lakon paradeiru, ho nune’e osan restu $1.050 tenke filafali ba kofre Estadu.

Notísia relevante: Estudante 8.899 hosi universidade 14 lakon direitu izensaun propina

Institutu Politékniku Betano-Kay Rala Xanana Gusmão (IPB-KRXG) iha estudante 419, hetan transferénsia $10.578, maibé estudante 381 de’it mak hetan pagamentu ho montante $9.462, enkuantu na’in-38 la halo konfirmasaun, tanba ne’e osa restu $1.116  filafali ba kofre Estadu.

Institutu Superiór Cristal (ISC) iha estudante 2.904, hetan transferénsia $413.005, selu de’it ba estudante 1.922 ho montante $279.070, enkuantu estudante na’in-1.018 lakon paradeiru, ne’ebé osan $133.932 filafali ba kofre Estadu.

Estudante Instituto Superiór de Filosofia e Teologia (ISFIT) hamutuk estudante 463 simu transferénsia osan $67.332, maibé estudante 431 mak hetan pagamentu de’it ho montante $64.312, enkuantu na’in-22 lakon kontaktu, ho nune’e orsamentu $3.020 filafali ba kofre Estadu.

Institutu Instituto Boaventura Timor-Leste (IBTL) iha estudante 123 simu transferénsia osan $9.225, maibé halo de’it pagamentu ba estudante 71 ho montante $5.325, enkuantu na’in-52 lakon no nunka halo konfirmasaun ba universidade, tanba ne’e osan $3.900 mak filafali ba kofre Estadu.

Instituto Católico Formação de Professores (ICFP) iha estudante hamutuk 322, simu transferénsia osan $48.300, ezekuta ba estudante 303 ho osan $45.450, enkuantu na’in-19 lakon direitu no osan $2.850 filafali ba kofre Estadu.

João Saldanha Institute (JSI) iha estudante 53 simu transferénsia osan $7.500, maibé estudante na’in-50 mak sai benefisiáriu, enkuantu na’in-tolu lakon direitu, tanba ne’e osan $450 filafali ba kofre Estadu.

Instituto S. João de Brito (ISJB) iha estudante  308 mak simu transferénsia osan $46.200, ne’ebé ninia ezekusaun atinje 100%.

Instituto de Ciências Religiosas (ICR) ho estudante hamutuk 245 simu transferénsia osan $36.750, ezekuta ba estudante 231 ho montante $34.650, estudante 14 lakon direitu no osan $2.100, filafali ba kofre Estadu.

Instituto Superiór Cristal (ICS) ho totál estudante 2.873 simu transferénsia osan $430.950, ezekuta ba estudante 2.564 ho osan $383.600, enkuantu estudante na’in-309 lakon direitu, tanba ne’e osan $46.350 fila ba kofre Estadu.

Institute of Business (IOB) ninia totál estudante 4.287 hetan transferénsia osan $576.790, ezekuta ba estudante 3.030 de’it ho osan $394.820, tanba estudante 1.257 la iha informasaun, tanba ne’e osan $181.970, filafali ba kofre Estadu.

Dili Institute of Technology (DIT) totál estudante 3.537 simu transferénsia osan $519.465, maibé estudante 2.712 mak hetan direitu ho osan 396.750, tanba na’in-825 lakon direitu pagamentu, enkuantu osan $112.715 filafali ba kofre Estadu.

Nune’e mós, Universidade Oriental Timor Lorosa’e (UNITAL) rasik iha estudante 8.274 simu transferénsia osan $824.280, ezekuta ba estudante 2.939 ho osan $266.955, tanba na’in-5,335 lakon paradeiru, ho nune’e osan osan $557.325 filafali ba kofre Estadu.

Universidade de Paz (UNPAZ) ninia estudante 9.167 simu transferénsia osan $1.151.970, ezekuta ba estudante 8.562 ho osan $1.070.136, enkuantu na’in 602 lakon direitu, tanba ne’e osan $81.835, filafali ba kofre Estadu.

Instituto Profissional de Canossa (IPDC) ninia estudante 338 simu transferénsia osan $50.700, ezekuta ba estudante 289 ho osan $43.350, ho nune’e estudante 49 lakon direitu no osan $7.350 filafali ba kofre Estadu.

Universidade de Dili (UNDIL) ho ninia estudante 6.414 simu transferénsia osan $622.277, ezekuta ba estudante 3.907 ho osan $441.597,50, maibé estudante 2.402 lakon direitu, tanba ne’e osan $180.680 filafali ba kofre Estadu.

Alende ne’e, East Timor Coffee Institute (ETCI) ninia estudante 1.210 simu transferénsia osan $134.140, ezekuta ona ba estudante 619 ho osan $68.300, tanba estudante 591 lakon direitu tanba nunka halo konfirmasaun, tanba ne’e osan $65.840 filafali ba kofre Estadu.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here