Uma Kbiit laek (UKL) iha suku Fatulia, postu administrativu Venilale, munisípiu Baucau. Imajen Tatoli/Natalino Belo.

DILI, 14 janeiru 2022 (TATOLI)—Diretora Programa Nasionál Dezenvolvimentu Suku (PNDS), Claudina Soares Pinto, hateten ekipa téknika PNDS sei halo sensibilizasaun kona-ba atividade konstrui Uma Kbiit Laek nian iha 18 janeiru 2022.

Notísia Relevante: PN aprova millaun $63,6 konstrui “Uma Kbiit Laek” 10 kada suku

“Ami-nia ekipa téknika programa PNDS nian sei halo sensibilizasaun ba atividade Uma Kbiit Laek iha munisípiu sira hotu iha 18 janeiru ne’e,” Diretora PNDS ne’e hateten ba Agência TATOLI, iha nia knaar fatin Colmera, Dili, sesta ne’e.

Tuir nia, ekipa téknika PNDS sei halo sensibilizasaun tuir siklu 12 ne’ebé sira prepara ona, tanba semana oin ne’e ekipa PNDS halo sensibilizasaun tuir siklu implementasaun hahú hosi munisípiu, suku no fó formasaun halo tranferénsia osan ba konta bankária suku nian.

Diretora ne’e hatutan, ekipa kontinua fó formasaun ba ekipa jestaun suku, ekipa halo prosesu verifikasaun ba iha suku sira, depois verifika dokumentu no halo survei ikus xefe suku asina akordu hafoin implementa atividade ida-ne’e.

Kona-ba kritériu, nia dehan, halo uma no identifika benefisiáriu hanesan de’it tanba atividade konstrusaun Uma Kbiit Laek (UKL) ba benefisiáriu ne’e kontinuasaun maibé nia kuantidade uma iha aldeia mak la hanesan.

Tanba uma 10 iha suku ida entaun aldeia ida iha benefisiáriu na’in-tolu, tan ne’e ekipa téknika PNDS nian mós sei halo matadalan ba uma kbiit laek ba programa PNDS nian para bele garante polítika ida-ne’e.

“Ita sei alarga uma 10 ba iha aldeia tolu iha kada suku ida. Parlamentu Nasionál (PN) aprova kuaze millaun $63.6 atu aumenta uma 10 iha suku,” nia dehan.

Ministru Administrasaun Estatál (MAE), Miguel Pereira de Carvalho, hateten iha tinan fiskál 2021 MAE liuhosi PNDS konstrui Uma Kbiit Laek (UKL) hamutuk 1254, ne’ebé nia progresu iha munisípiu hotu la’o di’ak no hetan apresiasaun boot hosi komunidade ne’ebé hetan benefísiu direta.

Tan ne’e, iha tinan 2022, Governu liuhosi Ministéiru Finansa aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hotu-hotu tanba redusaun 75% hosi orsamentu ne’ebé aloka iha tinan ida-ne’e.

Notísia Relevante: Konstrusaun Uma Kbiit Laek nia progresu fíziku foin atinje 14%

Jornalista : Osória Marques

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here