Diretór Explorasaun no Promosaun ANPM, Mateus da Costa. Imajen TATOLI/Francisco Sony

DILI, 14 janeiru 2022 (TATOLI)–Autoridade Nasionál Petróleu no Minerál (ANPM), sesta ne’e, taka submisaun dokumentu pré-kualifikasaun konkursu públiku (faze daruak) petrolíferu iha bloku 18, kompostu hosi 11 iha tasi laran no hitu iha rai-maran, ne’ebé antes ne’e Governu Timor-Leste lansa iha 03 loron outubru 2019.

“Tuir lolos konkursu ne’e taka iha outobru 2020, maibé tanba impaktu pandemia globál COVID -19 no restrisaun ba viajen internasionál tomak no mós haree filafali ba ambiente kreximentu indústria petróleu nian, liuliu iha parte investimentu upstream la’o ladun di’ak, nune’e ita konsege extende to’o inísiu tinan 2022, entaun ohin ita taka,” Diretór Explorasaun no Promosaun ANPM, Mateus da Costa, hateten, iha salaun ANPM, Ministériu Finansa, Aitarak-laran.

Notísia relevante: Timor-Leste Lansa Konkursu Públiku ba Bloku Foun 18

Mapa bloku 18. Imajen/ANPM

Antes tama faze ne’e, ekipa halo esforsu revizaun ba dokumentu hirak ne’ebé empreza hatama, hodi haree profile inklui kapasidade téknika no finanseira, hodi nune’e bele konkore ba prosesu konkursu faze dahuluk.

“Prosesu submisaun dokumentu pré-kualifikasaun, bázikamente ita haree liu ba empreza nia kapasidade téknika no finseira, nune’e bainhira sira halo submisaun dokumentu la kompletu ne’e laiha problema, tanba ita sei haree no bainhira iha dokumentu ne’ebé falta, ita sei komunika ba sira hodi halo aprosimasaun hodi bele kompleta,” nia akresenta.

ANMP nia objetivu mak haree empreza sira tenke iha kualifikasaun no kapsidade hodi bele konkorre ba konkursu ne’ebé sei loke hahú iha loron 24 janeiru.

“Signifika katak loron-10 nia-laran prosesu ne’e sei la’o durante fulan-rua resin, tanba prosesu ba submisaun konkursu ne’e loron ikus mak 04 marsu 2022 ho oras tuku 16:00 lorokraik, ne’ebé ita kuaze iha períodu fulan-rua nia-laran atu halo evaluasaun ba konkursu refere molok rekomenda ba membru Governu kompetente halo aprovasaun no anúnsia nia rezultadu iha fulan-abríl nia-laran” nia informa.

Rekerimentu submisaun dokumentu liuhosi online, ne’ebé kria iha sítiu online ida no empreza sira ne’ebé hetan ona access pass (user name no password) hosi ANPM mak bele ba upload rasik sira-nia dokumentu iha sítiu.

“Dokumentu sira ne’ebé konkorrente-sira manda ba email, ita sei la konsidera maibé ita sei fó hatene ba sira atu upload diretamente iha online. Mekanizmu ne’e ita foti atubele fasilita empreza hotu hosi rai ne’ebé de’it, tantu hosi rai-laran no rai-li’ur atu sira la presiza fízikamente mai hatama dokumentu maibé submete de’it via online,” Diretór dehan.

Empreza sia pré-kualifikadu

Prosesu evaluasaun ba submisaun dokumentu pré-kualifikasaun ne’e, normalmente bainhira empreza hatama, ekipa sira halo revizaun ba dokumentu no bainhira iha nesesidade ekipa sei responsável komunika ba reprezentante empreza atu klarifika ka kompleta dokumentu balun ne’ebé falta, hodi nune’e bele tulun ekipa téknika finaliza evaluasaun molok rekomenda ba jestór sira foti desizaun.

“To’o agora iha ona empreza hamutuk sia mak pré-kualifikadu, ne’ebé haat seluk dokumentu submete ona. Ita sei iha hela faze evaluasaun no ita sei hein tan oras hirak nia-laran, sei iha tan empreza mak submete tan dokumentu molok sistema online taka,” nia tenik.

Konkorrente sira maioria internasionál mai hosi nasaun Itália, Amérika, Austrália, Inglatera no seluk tán, ne’ebé balun antes ne’e halo ona operasaun iha Timor-Leste no balun foin mak tama, maibé iha mós empreza nasionál.

“Bázikamente ita loke fatin ne’ebé mamuk, daudaun seidauk iha entaun ita kontratu hotu. Tanba ne’e iha bloku 11 iha tasi-laran no hitu iha rai maran, ne’ebé rai maran kuaze kobre hotu iha Timór laran tomak no área kontratu ne’ebé hanesan daudaun ne’e perfurasaun la’o hela iha Suai no mós área kontratu iha Manufahi,” nia hateten.

Notísia relevante: ANPM Halo Promosaun Konkursu Públiku Mina no Gás Iha Bloku 18 Liuhosi Konferénsia Online

Nune’e mós, iha área kontratu foun ne’ebé foin lalais Governu asina kontratu ho Timor Gás no Petróleu, Empreza Públika (Timor GAP, E.P), iha mós bloku rezervadu seluk ne’ebé ba mós empreza estatál ne’e iha munisípiu Bobonaro.

Antes ne’e, ANPM ho kolaborasaun parseiru, organiza no partisipa iha simeira internasionál via virtuál hodi halo promosaun ba konkursu públiku petrolíferu bloku 18.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here