ANPM iha ámbitu konferénsia online iha edifísiu ANPM, kinta (02/07). Imajen Tatoli/Florêncio Miranda Ximenes

DILI, 02 jullu 2020 (TATOLI) – Timor-Leste liuhosi orgaun reguladór Autoridade Nasionál Petróleu no Minerál (ANPM) halo promosaun ba konkursu públiku mina no gás hamutuk bloku 18, kompostu husi 11 iha tasi-laran no hitu iha rai-maran liuhosi konferénsia online semeira globál (Globál E&P Summit) ne’ebé organiza husi empreza IN-VR Oil & Gas iha sede Reinu Unidu.

Diretór Esplorasaun no Promosaun ANPM, Mateus Da Costa, informa konferénsia globál ne’e partisipa husi nasaun 32 no kompañia internasionál ba mina no gás hamutuk 130 inklui kuaze ema na’in-1.000 mak akompaña.

“Liuhosi konferénsia online ne’e, Timor-Leste mak nasaun dahuluk apezenta no hala’o promosaun ba ita-nia konkursu públiku ba mina no gás hamutuk bloku 18 atu ema bele mai investe,” tenik Diretór ne’e hafoin aprezenta matéria promosaun liuhosi konferénsia online, iha edifísiu ANPM, kinta ne’e.

Tuir nia, iha simeira ne’e partisipa husi nasaun 32, tanba ne’e la’ós Timor-Leste mesak mak iha pontensialidade mina no gás bainhira kompara ho nasaun boot sira.

“Ita tenke esforsu maka’as liu atu hala’o promosaun liuhosi semeira sira atu ema hatene potensialidade jeolójia ka mina no gás iha Timor-Leste,” nia subliña.

Iha loron 9 jullu ne’e, Timor-Leste mós sei realiza konferénsia online hodi ko’alia detallu potesialidade jeolójia hodi manán interese kompañia internasionál sira atu mai aplika.

“Ita mós sei ko’alia rejime fiskál, rejime legál ein termu kontratu fahe produsaun no iha parte datoluk mak sei iha parte péritu ida husi nasaun Austrália sei aprezenta potensialidade jeolójika petróleu no envolve mós kompañia balun ne’ebé partisipa ona iha esplorasaun mina no gás iha Tasi Timór atu hada’u ema nia konfiansa barak atu mai investe ba bloku sira ne’e,” nia akresenta.

Promosaun ne’ebé ANPM hala’o ba nasaun barak ona hanesan Singapura, Londres, Abu Dabi, Estadu Unidu Amérika, Austrália no seluk tan, hatudu pasu pozitivu tanba empreza balun ne’ebé hatudu ona interese, balun hatama ona dokumentu sira ba pre-kualifikasaun no balun mós hola ona dadus lubuk ida iha bloku 18 ne’e rasik.

“Ita rai ki’ik, tanba ne’e bainhira ko’alia kona-ba promosaun mina no gás ne’e ita ko’alia ho liafuan simples de’it hanesan fa’an modo iha merkadu karik, tanba iha merkadu ne’e hotu-hotu fa’an modo ne’ebé ita mak tenke esforsu-an ba rai barak hodi bele konvense ema,” nia afirma.

Iha loron 3 outubru 2019, ANPM ho apoiu husi IN-VR Oil & Gas realiza simeira internasionál kona-ba Petróleu no Gás Timor-Leste (Timor-Leste Oil & Gas Summit 2019), no iha biban ne’e Governu Timor-Leste liuhosi Primeiru-Ministru, Taur Matan Ruak lansa ona konkursu públiku ba mina no gás hamutuk bloku 18.

Mina no gás iha bloku hirak ne’e, nia estrutura fatuk no basia identifika ona iha estudu sízmiku katak kamada fatuk ne’ebé iha potensialidade boot bele akumula petróleu no gás.

Tanba ne’e, Timor-Leste presiza servisu maka’as halo promosaun liuhosi simeira internasionál hodi ema bele mai investe.

IN-VR Oil & Gas hanesan empreza ne’ebé ninia sede iha Reinu Unidu no harii iha tinan 2016, ho esperiénsia servisu barak ho entidade governamentál sira atu promove sira-nia inisiativa iha setór petróleu, enerjia no minerál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here