Kondisaun ponte Dilor iha postu Lacluta, Viqueque ne’ebé kotu. Imajen/Espesiál

DILI, 13 janeiru 2022 (TATOLI)-Diretór servisu Ministériu Obra Públika (MOP) munisípiu Viqueque, Mario do Rego, informa ona kondisaun ponte Dilor ne’ebé kotu ba diresaun nasionál estrada no ponte hodi bele rezolve.

“Horiseik ha’u ba hasoru tan Diresaun Nasionál Estrada no Ponte hodi relata ponte Dilor ba sira nune’e bele aselera prosesu. Ha’u serbisu to’o iha ne’ebá hafoin sira hato’o tutan ba leten,” Diretór servisu munisipál hateten ba Agência TATOLI, via telefónika, kinta ne’e.

Ponte ne’e hanesan ligasaun postu administrativu Natarbora, munisípiu Manatuto bá postu administrativu Lacluta, munisípiu Viqueque.

Notísia relevante: Xefe suku Dilor husu Governu aselera hadi’a Ponte Dilor

Antes ne’e, Diretór servisu munisipál konvoka enkontru, ne’ebé envolve mós Institutu Jestaun Ekipamentu, Institutu Públiku (IGE, I.P), ne’ebé parte institutu rasik prontu rezolve ponte Dilor.

“Maibé agora la mosu iha terrenu, se IGE, I.P la prontu rezolve ponte Dilor karik hato’o fali karta ruma ba MOP, maibé agora nonok de’it. Parte institutu ne’e mós ladún koordena hamutuk ho Diresaun Nasionál Estrada no Ponte, satán ita hosi munisípiu Viqueque ne’e, maibé orientasaun Ministru ba mak institutu foin tun lalais,” Mario akresenta.

Tuir Diretór ne’e, MOP fó ona despaixu urjente ba ekipa IGE, I.P, maibé to’o agora seidauk mobiliza ekipamentu ba ponte Dilor.

“Kada tinan ponte ne’e kotu beibeik, nune’e MOP forma ona komisaun ne’ebé envolve mós estudante Universidade Nasionál Timor-Lorosa’e (UNTL) hosi fakuldade enejeñaria hodi halo estudu viabilidade ba ponte Dilor, nune’e bele halo morru protesaun ka aumenta tan ponte,” nia dehan.

Iha fatin seluk, Administradór munisípiu Viqueque, Januário Soares ‘Bolly’, haktuir, to’o agora ponte Dilor seidauk iha informasaun ruma hosi IGE, I.P, maibé iha parte Welolo ekipa destaka ona ekipamentu hodi hadi’a dalan sira ne’ebé bee sobu bainhira akontese dezastre naturál.

“Ha’u hanoin ba ponte Dilor ne’e, bainhira Konsellu Administrasaun Fundu Infraestutura (KAFI) iha reniaun ruma, bele deside para aumenta ai-riin, atu bee labele sobu beibeik tan. Ha’u sei enkontru mós ho Administradór Manatuto hodi haree asuntu ponte Dilor hamutuk,” nia tenik.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here