Brigada Ambientál hosi SEA hala'o atividade resiklajen ba masa bee no roda a’at hodi transforma ba jardín verde, iha tasi-ibun, Praia dos Coqueiros, kinta (13/01). Imajen TATOLI/Francisco Sony

DILI, 13 janeiru 2022 (TATOLI)—Sekretaria Estadu Ambiente (SEA) liuhosi serbisu volutáriu Brigada Ambientál, halibur lixu hanesan masa bee mamuk no roda a’at sira hodi transforma sai jardín verde iha área tasi-ibun.

Membru Brigada Ambientál, Gilberto da Silva Correia, hateten, membru sira rekolla lixu masa bee mamuk hamutuk 1.000 iha tasi-ibun no dalan ninin iha Dili laran inklui roda ne’ebé foti iha ofisina sira.

Brigada Ambientál hosi SEA, Gilberto da Silva Correia. Imajen TATOLI/Francisco Sony

“Ami serbisu ho voluntarizmu hodi halibur lixu ne’ebé komunidade soe hodi transforma sai jardín verde. Ida-ne’e hanesan ami-nia inisiativa rasik hodi hamenus lixu sira iha Dili no bele fó ezemplu di’ak ba joven seluk,” Brigada Ambientál hateten ba Agência TATOLI, iha Praia dos Coqueiros, kinta ne’e.

Inisiativa ne’e mosu bazeia ba konseitu ambiente mundiál hodi redús lixu , ne’ebé hanaran Reduce Re-use and Recycle (3R) ka redús, utiliza no resiklajen, nune’e bele kria ambiente moos.

Tuir Brigada Ambientál, sira enxe rai-henek iha masa bee mamuk sira ne’ebé rekolla no hada modelu hanesan batako sai lutu inklui roda halo sai hanesan meza no kadeira.

Brigada Ambientál hosi SEA hala’o atividade resiklajen ba masa bee no roda a’at hodi transforma ba jardín verde, iha tasi-ibun, Praia dos Coqueiros, kinta (13/01). Imajen TATOLI/Francisco Sony

Jardín verde ne’e rasik daudaun sira sei harii hela no sei tau mós avizu ida kona-ba oinsá labele soe lixu arbiru no sei kuda mós ai-funan oioin hodi hafurak jardín, nune’e fó motivasaun ba joven sira seluk.

“Hakarak fó hanoin katak jardín verde ne’e sai fatin ba ita hotu, tanba ne’e mai ita hamutuk kuidadu ambiente iha ida-idak ninia fatin tanba hanesan foin-sa’e tenke hateten (Ha’u moe soe lixu arbiru),” Gilberto dehan.

Nune’e, prosesu halo jardín verde hahú loron 13 janeiru to’o 11 fevereiru 2022 no sei halo inaugurasaun iha loron 14 fevereiru 2022 hosi SEA.

Antes ne’e, iha loron 26 outubru 2020, SEA estabelese Brigada Ambientál ho membru 300 atu salva guarda ambiente.

Notísia relevante: SEA lansa brigada ambientál 300 voluntáriu asegura ambiente

Brigada Ambientál hosi SEA hala’o atividade resiklajen ba masa bee no roda a’at hodi transforma ba jardín verde, iha tasi-ibun, Praia dos Coqueiros, kinta (13/01). Imajen TATOLI/Francisco Sony

Brigada Ambientál fahe ba parte rua, ida hodi haree ambiente tasi no ida haree ambiente foho nian.

“Zona tasi nian foku ba hamoos ambiente tasi no halo jardín verde, enkuantu zona foho ne’e nia serbisu mak trava kadalak no kuda ai-oan sira hodi troka ai sira ne’ebé komunidade tesi, nune’e lebele akontese rai monu no rai halai,” nia tenik.

Brigada Ambientál zona kosteira nia atividade ne’ebé durante ne’e hala’o, halo kolaborasaun ho Programa Nasaun Unida ba Dezenvolvimentu (PNUD), ne’ebé kuda ona ai-oan hahú hosi jardín BJ Habibie to’o Praia dos Coqueiros.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here