Sekretáriu Estadu Estadu, Demétrio do Amaral de Carvalho, entrega kartaun ba brigadista ambientál sira, iha segunda (26/10), iha kampu demokrasia. Imajen Tatoli/Florêncio Miranda Ximenes

DILI, 26 outubru 2020 (TATOLI)—Governu liuhosi Sekretaria Estadu Ambiente (SEA) lansa  brigada ambientál hamutuk 300 atu proteje no salva guarda ambiente iha Timor-Leste.

Sekretáriu Estadu Ambiente, Deométrio do Amaral do Carvalho, informa brigadista hirak ne’e sei halo protesaun ba floresta, re-florestasaun nasionál, kombate ambientál urbanu, kontrola ambiente hanesan sunu rai, soe lixu no atividade seluk ne’ebé bele estraga ambiente.

“Ohin hanesan selebrasaun loron nasionál ambiente iha loron 26 outubru, ne’ebé ita selebra ho lansamentu dahuluk ba brigada ambientál,  ne’ebé ita foin halo formasaun loron rua ba brigadista sira hamutuk 300,” Sekretáriu Estadu Deométrio informa bainhira lansa brigada ambientál iha kampo demokrasia, segunda ne’e.

Notísia Relevante: SEA estabelese brigada hodi halo intervensaun ba problema ambientál

SEA  iha planu tinan 2021 brigadista sira bele atinje ona 1.000-resin, tanba haree ba kuantidade joven barak iha sosiedade.

“Ita hatene juventude  hanesan kamada boot liu iha sosiedade, tanba ne’e presiza kapitaliza atu partisipa ativu iha prosesu dezenvolvimentu no bele salva guarda, proteje no asegura ambiente,” nia akresenta.

Iha fatin hanesan, Xefe Estadu Maior FALINTIL-Forsa Defeza Timor-Leste (F-FDTL), Coronel Calisto Santos ‘Coli’ Coliati, enkoja brigadista sira atu sai ajente transformadór atu asegura ambiente iha Timor-Leste.

“Imi-nia papél importante tebes atu kontinua halekar informasaun no formasaun ba ita-nia sosiedade tomak atu para tesi ai, sunu rai arbiru no seluk tan,” nia fó hanoin.

Nia konsidera, inisiativa ne’e atu hafanu filafali joven iha organizasaun no movimentu sira atu iha espíritu voluntarizmu hodi iha neon no hakarak salva, proteje no konserva ambiente.

Nune’e mós, Reprezentante Brigada Ambientál, Sebastião Moniz Pereira, dehan brigadista sira prontu ho voluntáriamente asegura ambiente no apresia inisiativa Governu hodi fó formasaun antes lansa ekipa ne’e.

Biban ne’e, brigada sira husu ba sidadaun hotu atu koopera no serbisu hamutuk hodi luta no asegura ambiente saudável no mós ba jerasaun tuir mai.

Brigadista sira mai hosi estudante universitáriu, ne’ebé simu formasaun hosi Sekretáriu Estadu Deométrio, Diretór Ezekutivu Permatil Ego Lemos, Diretór Jerál Floresta, no reprezentante hosi Protesaun Sivíl. 

SEA sei halo ligasaun ho ministériu sira iha servisu ambiente hanesan Ministériu Agrikultura no Peska (MAP), ne’ebé tau matan ba floresta, ambiente tasi, no sei serbisu ho bombeiru atu fó formasaun ba joventude hodi bele partisipa di’ak liu iha dezastre naturál ruma hanesan rai nakdoko, tsunami, inséndiu boot, atu voluntáriu sira bele halo intervensaun ruma.

Seremonia lansamentu ne’e partisipa husi Ministru Agrikultura no Peska, Pedro dos Reis, Sekretáriu Estadu Juventude no Desportu, Abrão Saldanha, Sekretáriu Estadu Protesaun Sivil, Joaquim Gusmão, Reprezentante komisáriu Polísia Nasionál Timor-Leste (PNTL), Diretór hosi liña ministériál sira, Reprezentante Coservasaun Internasionál (CI) inkluo brigadista ne’ebé halo ona formasaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here