Seremónia despedida no asina deklarasaun ho família, iha salaun DNEE, Becora, kuarta (12/01). Imajen TATOLI/Francisco Sony

DILI, 12 janeiru 2022 (TATOLI)–Sekretaria Estadu Formasaun Profisionál no Empregu (SEFOPE), kuarta ne’e, realiza seremónia despedida no asina deklarasaun ho família traballadór 71, ne’ebé sei aranka ba Koreia Súl iha loron 14 janeiru tinan ne’e.

Sekertáriu Estadu Formasaun Profisionál no Empregu (SEFOPE), Alarico do Rosário. Imajen TATOLI/Francisco Sony

Iha seremónia ne’e, Sekretáriu Estadu Formasaun Profisionál no Empregu, Alarico de Rosário, hateten, objetivu akordu ne’e atu traballadór sira bele iha responsabilidade.

“Husu ba traballadór timor-oan sira kaer prinsípiu no serbisu didi’ak hodi buka osan no haruka mai hadi’a ekonomia família,” governante ne’e dehan iha salaun Diresaun Nasionál Empregu Exteriór (DNEE), Becora.

Notísia relevante: SEFOPE prepara traballadór na’in-91 aranka bá Koreia Súl iha janeiru 2022

Biban ne’e, Sekretáriu Estadu husu traballadór sira atu hatudu atitude di’ak no kumpre regra sira.

“Imi ba la’os reprezenta-an maibé reprezenta nasaun. Imi sira ne’ebé hetan ona oportunidade serbisu, hatudu komportamentu di’ak, labele ses-an hosi sistema, nune’e empregadór sira bele emprega tan joven barak ne’ebé hein hela oportunidade atu ba serbisu iha Koreia Súl,” nia akresenta.

Diretór Nasionál Empregu Exteriór SEFOPE, Filomeno Soares. Imajen TATOLI/Francisco Sony

Iha fatin hanesan, Diretór Nasionál Empregu Exteriór, Filomeno Soares, husu família traballadór atu kumpre deklarasaun ne’ebé asina, katak prontu atu husik traballadór sira ba serbisu no karik mosu problema parte rua mak responsabiliza atu rezolve.

Seremónia despedida no asina deklarasaun ho família, iha salaun DNEE, Becora, kuarta (12/01). Imajen TATOLI/Francisco Sony

Prosesu teste médiku ba traballadór sira hotu ona no loron 13 janeiru sei hala’o teste PCR COVID-19, ne’ebé bainhira rezultadu hatudu negativu mak kontinua tama kuarentena durante kalan ida.

Traballadór timor-oan ne’ebé sei ba serbisu iha Koreia Súl kompostu hosi mane hotu, ne’ebé sei serbisu iha área fábrika ema na’in-28 no área peska 30, enkuantu ba traballadór re-entri ema na’in-13.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here