SEFOPE konvoka enkontru ho kandidatu traballadór timor-oan ne’ebé tuir planu iha tempu badak sei arranka ba Koreia Súl. Imajen/SEFOPE

DILI, 20 dezembru 2021 (TATOLI)—Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), hamutuk ho Human Resource Development (HRD) Koreia, konvoka enkontru ho kandidatu traballadór timor-oan na’in-91.

“Ohin ita halo entry list ba ita-nia kandidatu traballadór na’in 91 ne’ebé tuir planu sei aranka ba Koreia Súl iha loron 14 janeiru 2022,” Diretór Nasionál Empregu Exteriór Filomeno Soares, hateten, liuhosi nota ne’ebé Agência TATOLI asesu, segunda ne’e.

Notísia relevante: Traballadór timor-oan na’in-23 arranka ohin ba Koreia Súl

Antes ne’e DNEE halo ona enkontru inisiál ho traballadór sira hodi fó sai kritéria hosi Governu Koreia Súl.

“Regulamentu ne’ebé sira fó sai hanesan, ita rasik prepara osan no tuir prosedimentu COVID-19 hanesan simu vasina kompletu, teste médiku ho PCR no molok traballadór sira arranka tenke halo karantina durante kalan-ida iha otél sira iha Dili, no bainhira to’o iha Koreia Súl sei tama kuarentena durante loron-10,” nia akresenta.

Nune’e, Diretór ne’e apela ba kandidatu traballadór sira hotu atu kuidadu nafatin sáude, tanba antes atu aranka sei halo teste médiku no bainhira deteta moras sei halo kanselamentu. To’o iha Koreia Súl mós realiza tan teste médiku no bainhira hetan moras sei deporta fila.

Kandidatu traballadór 91 kompostu hosi mane hotu no sei ba serbisu iha área peska na’in-56, no área fábrika na’in-35.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here