Xefe Estadu Maiór Jenerál F-FDTL, Tenente Jenerál Lere Anan Timur ho nia ezposa, hasai foto hamutuk ho ofisiais komponente Naval iha Hera, kuarta 12/1/2022 Imajen TATOLI/Antonio Dasiparu

DILI, 12 dezembru 2022 (TATOLI)— Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Lere Anan Timur, hateten, durante tinan 20, ejisténsia Kompontente Forsa Navál Lijeira hasoru difikuldade no dezafiu oin-oin, tanba ne’e Governu kontinu investe infraestrutura no rekursu umanu hosi sai forsa ne’ebé forte asegura riku-soin iha tasi timór.

“Ita nian Governu dezenvolve ona komponente navál fazeadamente tanba laiha Governu ida rezolve kestaun ida iha loron ida, maibé presiza tempu. Ha’u husu sé de’it mak mai tenke tau prioridade ba infrastrutura ba base navál, nune’e bele dezenvolve-aan di’ak liután no sai komponente ida ne’ebé forte no sólidu,” Tenente Jenerál Lere Anan Timur, hateten iha ámbitu selebra anivesáriu Komponente Forsa Lijeira iha Hera, kuarta ohin.

Iha tinan 2002, Governu Timor-Leste harii base forsa navál ne’e, la hetan aseitasaun hosi Organizasaun Nasaun Unidu (ONU) ho razaun seidauk nesesáriu atu harii ka iha komponente navál iha F-FDTL.

Xefe Estadu Maiór Jenerál F-FDTL, Tenente Jenerál Lere Anan Timur, Imajen TATOLI/Antonio Dasiparu

“Maibé, ha’u rasik momentu ne’ebá hateten katak ita presiza iha komponente navál atu oinsá mós ita mak  jere tanba ita mak na’in,” Lere relembra.

Nune’e, Komandante Lere husu ba membru Komponente Navál ne’ebé sai fundador sira no sira ne’ebé hatutan hametin unidade, disiplina hodi serbí Estadu no nasaun.

“To’o ohin, ita kompleta tinan 20 ejisténsia komponente navál ho rekursu ne’ebé oituan, tanba ne’e husu ba ita bo’ot sira buka aumenta ita nia matenek, nune’e bele profisionaliza ita bo’ot sira nia aan no atu ita hamutuk harii komponente ne’ebé mak metin no forte,” Tenente Jenerál Lere enkoraja.

Nune’e, Komandu F-FDTL ne’e rekomenda ba Governu atu kontinua tau-matan no halo investimentu ba kondisaun moris forsa armada nian no infraesturtura sira hodi garante defeza nasionál liuliu amesa sira hosi rai li’ur.

Alende ne’e, Veteranu Lere husu ba membru komponente navál atu rona malu, respeita malu, no ho loyalidade ba superiór sira hodi dezenvolve institusaun F-FDTL liuliu komponente navál bele sai forsa di’ak liu.

“Hatudu imi nia komportamentu di’ak iha sosiedade, nune’e sosiadade hadomi imi, la’ós imi mak halo fali problema iha sosiedade hosi povu tauk fali militár, tanba militár mak liman kroat povu nian,” Lere fó hanoin.

Iha biban hanesan, Komandante Kompontente Forsa Navál Lijeira, Kapitaun Fragata, João da Silva, hateten, inísiu estabelesimentu Komponente Navál ho dezafiu oin-oin liuliu rekursu umanu no faslidade inklui infraestrutura limitadu.

Kapitaun Fragata, Joao da Silva, komandante komponente Naval. Imajen Tatoli/Antonio Dasiparu

“Ita hahú ho ema ema nain- 45, maibé dadaun iha ona membru na’in-500, ha’u hanoin ida ne’e seidauk sufisiente, buat ne’ebe Governu presiza halo maka buat tolu ida haforsa rekursu umanu, infraestrutura no finaseiru. Nune’e bele dezenvolve diak liután,” Komandante ne’e rekomenda.

Hodi hatutan: “Ita hatene iha tinan 20 hahú haruka ita nian ema 50% mak ba eskola iha ema nia rai, iha área Naval nian, balun dadaun ne’e ita uza hodi hamutuk dezenvolve ita nian forsa navál”.

Notísia Relevante: MD loke ona konkursu ba manutensaun ró navál 

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here